Sot u mbushën 10 vjet nga Masakra e Reçakut

Voal-online- U mbushen 10 vjet nga masakra e Reçakut. Dhjetë vjet më parë ndodhi njëra prej tragjedive më të përgjakshme në fshatin Reçak të Shtimes, që ngriti botën në këmbë, kur forcat serbe të sigurimit vranë të paktën 45 civilë shqiptarë. Ish-shefi i Misionit vëzhgues të OSBE-së, ambasadori Uilliam Uoker, këtë ngjarje e pati cilësuar si "krim kundër njerëzimit". Masakra e Reçakut njihet si një nga ngjarjet kryesore që ka shënuar kthesë në diplomacinë ndërkombëtare në raport me Serbinë dhe Kosovën, duke u paraprirë proceseve që ndikuan në fushatën e bombardimeve të NATO-s. Në këtë përvjetor, ish-ambasadorit Uiliam Uoker i dha mirënjohja speciale nga Kuvendi komunal i Shtimjes "Paketa e Artë për Humanizëm dhe Liri". Në fshatin Reçak sot është përkujtuar dhjetëvjetori i masakrës së Reçakut, ku u masakruan 42 civilë. Presidenti i Republikës, Fatmir Sejdiu dhe kryeministri Hashim Thaçi thanë se Reçaku ka qenë dhe vazhdon të jetë dhimbje e të gjithë shqiptarëve sepse në mënyrë mizore u vranë shumë civilë shqiptarë.