|
Policia serbe arrestoi në Preshevë 10 shqiptarë
E Premte, 12.26.2008, 06:03pm (GMT+1)
26 dhjetor (Voal-online) Radio Evropa e Lirë bëri të ditur se autoritetet e Serbisë kanë arrestuar të premtën dhjetë shqiptarë, të dyshuar se janë të përfshirë në vrasje dhe rrëmbime në Kosovë në vitin 1999, ka njoftuar zyra e prokurorisë së Serbisë për krime të luftës. Një zëdhënës i prokurisë së Serbisë për krime të luftës tha se "Prej qershorit 1999 e deri në tetor të vitit 1999, ata ishin të involvuar në së paku 51 vrasje dhe 159 rrëmbime në qytetin e Gjilanit në Kosovë." Sipas tij "të gjithë ata ishin anëtarë të Ushtrisë Çlirimtare të Kosovës".
Më tutje ai tha se "aksioni ishte përgatitur në katër muajt e fundit" dhe shpjegoi se disa të arrestuar nuk kanë jetuar në Serbi, por kishin ardhur për ta kaluar Vitin e Ri me familje. Nga ana tjetër, deputeti shqiptar në Kuvendin e Serbisë, Riza Halimi, vlerësoi sot se arrestimet e shqiptarëve në Luginën e Preshevës nuk çojnë kah stabilizimi i situatës në këtë rajon. Ai tha se "ishte absolutisht e panevojshme që në aksionin e arrestimit të marrin pjesë më se 100 pjesëtarë të xhandarmerisë, me bllokim të rrugëve dhe me keqtrajtimin e banorëve". Ai tha se "dikujt i duhet që në jug të Serbisë, kohë pas kohe, të ngritët temperatura, për ta arsyetuar përdorimin e xhandarmerisë". Deputeti Riza Halimi më tutje tha se "absolutisht kjo nuk është në rregull dhe nuk i kontribuon stabilizimit të këtij rajoni". Halmi gjithashtu theksoi se aksioni i arrestimit ishte realizuar me shumë tejkalime të autorizimeve zyrtare, me ç'rast është rrahur një i ri dhe "ka pasur provokime policore të pjesëtarëve të xhandarmerisë".
|
Printo
