|
Borë në Veri të Shqipërisë ku rëndohet qarkullimi në disa akse
E Shtunë, 12.13.2008, 03:52pm (GMT+1)
13 Dhjetor - Shiu dhe dëbora që nisi sot në mëngjes në zonën verilindore të Shqipërisë kanë shkaktuar probleme në disa akse të rëndësishme të vendit. Kështu bëjnë me dije mediat e vendit, të cilat citojnë burime nga Drejtoria rajonale e Rrugëve që informon se reshjet e dëborës që nisën në mëngjes në gjithë rajonin verilindor, kanë shkaktuar vështirësi në lëvizjen e mjeteve në aksin kryesor rrugor që lidh Tiranën me Kukësin dhe me doganën e Morinit.
Trashësia e dëborës në këtë zonë ka arritur mbi 10 centimetra dhe për normalizimin e situatës është dërguar një borëpastruese. Nga të njëjtat burime mësohet se shiu i dendur dhe dëbora në zonat e larta kanë shkaktuar bllokimin e akseve që lidhin komunat e Arrnit, Grykë Cajës, Zapodit e Kalisit me pjesën tjetër të vendit. Në disa fshatra të këtyre komunave trashësia e dëborës ka arritur mbi 30 centimetra. Reshjet e shiut e dëborës kanë shkaktuar probleme edhe në rrugët që lidhin Kukësin me Shishtavecin e Peshkopinë, ku ka patur rrëshqitje dheu e gurësh në trasenë e rrugës. Ndërkohë janë intensifikuar përpjekjet për mbajtur hapur akset kryesore rrugore, veçanërisht atë Morin-Kukës-Qafë Shllak ku është dhe lëvizja më e madhe e automjeteve. (Voal-online)
|
Printo
