VOAL - Online Zëri i Shqiptarëve | ||||
PO ERDHE NË "ELDORADO", I DASHUN MIK, MERR ME VETE PAK UJË TË KRITË VALBONE Poezi nga XHENC BEZHI E Djelë, 01.30.2011, 05:09pm (GMT1) Ky diell i paktë As pranverë, as vjeshtë; as zgjuet, as fjetë. Pak verë, dimën shumë Dielli i zbehtë, portokall, krejt pak dritë, pa ngrohtësi, yni i kuq all. I ngrysun si kjo ditë prej pune , drejt shtëpisë; nata e jona, dita e zotnisë Kjo ditë me diell kaq të paktë, më ndrysh, gjak e lak, një ditë ma shumë asht një ditë ma pak. Për një kore bukë, mundqarë pse s'deshtem me lypë, pak bukë të ngjyeme në lot e të lidhun në grykë. Rinia - e trishtë, përditë e ma e largtë, e ardhmja - e zbehtë, si ky diell i paktë. -- PA VIZA Po erdhe në "Eldorado", i dashun mik, merr me vete pak uji të kritë Valbone, si lang bore, porsa dalë nga gurra. Merr edhe do kangë majëkrahu, te epit malësor e me ta jehonën e maleve. Nga thellësia e Nanëtokes, një grusht dhe të pastër nxirre, prej aty ku gjaku i përziemë s`arriti ta ndotë. Hinin e Dardanisë së shkrumueme ma sill, që prushin e mërgimtarit të pafikun ta ruej.
Salzburg Nentor 2010 --
Arena Në arenën e kryeqytetit gladiatorë të moshuar, të ri, binin shtri me urdhën të të vetëve a t' atyne karshi. Ata, nga të dyja anët, vinin baste dhe ndiqnin me dylbi, krejt të qetë, me një zgërdhimje të lehtë. Me gishtin e madh tregonin kush të vritej, kush të falej, egon e tyne kënaqnin në lojën me gishta perandorët bisha.
Janar 2011 Kulla Kulla do odë burrash e pleq me urtì; nder e za do kulla, do edhe frëngji. Jo jo, kullë s'ash ajo pa kuvend burrash, po kullë s'asht as pa të rijë Kulla asht kullë kur besa asht besë e fjala peshon sa mali me borë, e kurrëkush s'e shklet. Kulla asht kullë kur t'hapun derën mba' , e të mbylluna shtigjet e pabesisë ajo i ka. Kulla, si ura, që dy brigje bashkon, burrat dy herë i ban burra e tri herë sa kulla i nalton.
XHENC BEZHI
|
||||
Copyright © 2005-2008 Nulled by [x-MoBiLe]. All rights reserved. |