24 dhjetor (Voal-online)- Dje u bë e ditur se Majkëll Xhekson është shëndoshë e mirë. Zëdhënesi i këngëtarit e përgënjeshtroi lajmin e përhapur nga mediat perëndimore, të cilat gjatë këtyre ditëve kanë përhapur panikun për gjendjen shëndetësore të Mbretit 50 vjeçar të Muzikës Pop. Ato bazohen në bisedat e biografit të këngëtarit, Ian Halperin, me gazetarin hetues të revistës "Rolling Stone". Mediat nuk duhet të ndikohen nga burime të paautorizuara, tha zëdhënësi i këngëtarit. Sidomos media të besueshme, siç është revista në fjalë, tha ai nuk duhet të bien në pozita të tilla në të ardhmen, sepse ashtu do të jenë viktimë e atyre që tentojnë të përfitojnë me spekullime. Shkas për përhapjen e lajmeve ishte fotografimi i Majkëll Xheksonit para dhjetë ditësh në Los Anxhelos, kur ai po shkonte për vizitë tek mjeku. Këngëtari kishte një maskë në fytyrë dhe ndodhej në një karrike me rrota. Kjo fotografi u përhap menjëherë në mediat perëndimore.