AKUSH S’MË BINDET Nga FASLLI HALITI
E Enjte, 12.12.2013, 01:27pm (GMT+1)
Të gjithë S' më binden Dhe fajin, besoj, e kam unë vetë. Unë duhet ta kem një dobësi, Unë duhet ta kem patjetër Një të metë.
Kur isha bujk adoleshent, Qetë s'më bindeshin Përtypeshin qetë, S'e tërhiqnin Plugun. Hutohesha pas pulëbardhave unë, Si napa të bardha Pulëbardhat Mbi ugar, Si napat e lara të nënës Që nëna i nderte mbi gardh për t'i tharë.
Përkundrazi,xhaxhait, Qetë i bindeshin Njëherësh Të dy, Kau me emrin Zambak, Dhe kau me emrin Syzi.
Po pse i bindeshin Xhaxhait Qetë ? Sepse xhaxhai ishte bujk i rëndë Bujk që e nderonin bujqit, bujk i vërtetë ...
Si mësues gjithashtu nuk kisha autoritet S'më bindeshin nxënësit, Nuk mësoni S'i bënin Detyrat. Më shihnin ata me habi... Kur unë përhumbesha në përfytyrime, Vizatoja, bëja skica, krokira, krijoja poezi...
Nxënësit harbonin... Dilnin nga klasa. Dikush në WC pinte një cigare. Një vajzë në korridor Provonte puthjen e parë...
Edhe si prind S'kam pasur Dhe s'kam autoritet. Kjo s'më pikëllon aspak Le të jetë mbi mua fëmija mbret. Le të më gjej nga fëmija gjithçka, Vetëm fëmijën të mos e gjejë prej meje asgjë.
Midis poezisë sime Dhe fëmijëve të mi, Ka pasur dhe ka rivalitet Ka pasur dhe ka xhelozi...
Edhe si gjysh Nuk kam autoritet. Kjo më kënaq, Kjo më krijon gëzim. Mbesa dhe nipi bëjnë ç'të duan me mua; Më hipin mbi kurriz të dy Më bëjnë kalë me fre, Me yzengji;
Më kundërshtojnë, S'më binden S'më dëgjojnë,
Unë u bindem urdhrat e tyre I zbatoj pa u fyer aspak, I zbatoj Gjithë përulësi,
I zbatoj me kënaqësi...
FASLLI HALITI
|