PUTHMË
Nga JACQUES PREVERT
E Shtunë, 04.19.2014, 09:51am (GMT+1)
 Në një lagje të qytetit Lumier
Ku është terr gjithmonë e ajër s'ka
E dimër bën dimër e verë
Ajo ishte në shkallë
Ai ish pranë saj e ajo pranë tij
Ishte natë aty
Vinte era squfur
Sepse pasdite kishin vrarë çimka
E ajo i thoshte atij
Këtu është terr i zi
Ajër nuk ka
Dhe dimër është dimër e verë
Dielli i të madhit Zot nuk ndrin për ne
Ka madje tepër punë në lagjet e të pasurve
Shtrëngomë mes krahëve
Puthmë
Puthmë gjatë
Puthmë
Më vonë do të jetë tepër vonë
Tash për tash është jeta jonë
Këtu plasaritet gjithçka
Nga ngrica e nga vapa
Mërdhin e ngel pa frymë
Këtu ajër s'ka
Nëse ti resht së më puthuri
Besoj se do të vdes së mbytyri
I ke pesëmbëdhjetë vjet e unë pesëmbëdhjetë vjet
Së bashku bëjmë tridhjetë
Tridhjetë vjeç s'je fëmijë më
Kemi moshën për punë tashmë
Kemi të drejtën edhe të puthemi
Më vonë do të jetë tepër vonë
Tash për tash është jeta jonë
Puthmë ti!Përktheu: SKËNDER BUÇPAPAJ
|
Comments (0)
Dërgoja shokut
Printo
