VOAL - Online Zëri i Shqiptarëve

UNË JAM VERTIKALE Nga SYLVIA PLATH E Djelë, 04.20.2014, 08:43am (GMT1)   Unë jam vertikale Por do të parapëlqeja të isha horizontale. Nuk jam një pemë me rrënjë në dhé që përthith minerale e dashuri amnore në mënyrë që të farfurij nga gjethet çdo mars, nuk jam as hijeshija e një trëndafileje e larushitur sa të ngjall thirrje habie, pa e ditur se së shpejti do t'i humbas petalet e mia. Krahasuar me mua, një pemë është e pavdekshme e gonxhja e një luleje, jo e lartë, por më e bujshme: nga e para jeta e gjatë, nga e dyta më mungon guximi. Sonte, në dritën e paskajme të yjeve, pemët dhe lulet i kanë përhapur aromat e tyre të ftohta. Kaloj përmes, por asnjëra sosh s'do t'ia dijë. Nganjëherë mendoj se teksa fle ndoshta iu ngjas atyre në mënyrën më të përkryer - me mendimet e mia të bëra tym. Sonte shtrirja për mua është më natyrale. Ashtu qielli dhe unë jemi në bisedë të hapur, e do të jem e dobishme ditën që do të qëndroj e shtrirë përgjithmonë: më në fund pemët do të më prekin, lulet do të ma kenë ngenë. Përktheu: SKËNDER BUÇPAPAJ

Copyright © 2005-2008 Nulled by [x-MoBiLe]. All rights reserved.