VOAL - Online Zëri i Shqiptarëve

QYTETIT TIM Nga PIERRE SIMSIA E Martë, 08.26.2014, 10:19am (GMT1) Qyteti im! Ç'të ka rrënë ky nur! Kam mall, të shoh pas kaq vitesh Po më dukesh më i bukur se kurrë! Shtëpitë e ndërtuara njëra mbi tjetrën, Që asnjë piktor s'do t'i vendoste dot aq bukur. Unë piktor dua të bëhem për ty sot, Në telajo të hedh mallin e pashuar... Dua të pi ujë Bogove, Ajrin e pastër të pishave të thith. Të shoh diellin n'agim kur del mbi Tomorr, Të udhëtoj në linjën Kombinat - Uznovë. Erdha tek ti qyteti im! Këto rrugica të shtruara me kalldrëm Më çojnë në të largëtën fëmijëri. Nuk u çmallkam dot me ty Dhe pse i puth të gjithë e përlotem si fëmijë.. Erdha tek ti qyteti im, Tek ju o njerëz të mirë e të dashur. Tek ti vendlindja ime jam tani, Ju, përherë mall e dashuri më keni falur... Vetë natyrës i ke marrë Gjithë këtë bukuri të rrallë. Mua vallë ç'do më japësh Të më shuaj sado pak mall?! Do marrë pak ujë të ftohtë Bogove. Si ujin e bekuar në shtëpi t'a mbaj. Me pikatore t'a pi, etjen të më shuaj, Mallin për Beratin do mundet dot vallë? Do marrë një gur nga kalldrëmi, Nga ajo rrugicë ku hodha hapin e parë. Një degë pishe nga Mali i Gorricës, Ngado që të shkoj, me vete t'a mbaj. Kam shumë vjetë i mërguar. S'më dëbove, u largova. U enda shteteve në tokë të huaj, I përbuzur, i pangrënë, i skllavëruar. Berat! Je djali i Europës, Shpirti që më jep frymë je ti, më mban gjallë. Amerika dhe Europa, Je vetë ti, i ndrituri Berat. Malli i zjarrtë që digjet ndër vite. Mallin nuk e qetëson as gjumi. Sikur Tomorri të shkrihej e bashkë me Osumin, Mallin s'do mundeshin dot t'a shuanin! S'qenka e lehtë të ndahesh nga qyteti, Që tridhjetë vite më mbajti në gji. Vij nga udhë e gjatë kurbeti, Por..., do kthehem përsëri. Dhe kur një ditë vdekja të trokasë Nuk dua shpirti të më dalë në tokë të huaj. Pranë varreve të prindërve të mi dua të prehem, Dheu i tokës mëmë të më tresë, dua. (Nga libri im "FALEMINDERIT" Shënime nëpër vite) PIERRE SIMSIA

Copyright © 2005-2008 Nulled by [x-MoBiLe]. All rights reserved.