Emigrantët shqiptarë në Greqi marrin mesazhe telefonike nga Demokracia e Re, ku i premtohet ardhmëria më e mirë e Vorio-Epirit. Kjo situatë ka irrituar shqiptarët, të cilët ashtu si edhe grekët do të shkonin të votonin kandidatët lokalë në turin e dytë të zgjedhjeve për bashkitë e komunat. Për pjesën dërrmuese të emigrantëve tanë atje, termi Vorio-Epir nuk duhet të ekzistojë më, e kjo gjë ka bërë që shumë prej tyre të vendosin bojkotin në zgjedhje. "Nëse përdoret ende ky term i turpshëm, Vorio-Epir atëherë, mund të na e thotë ndonjë ku gjendet Epiri i Jugut?. Kjo është politikë e ashpër me qëllim destabilizimin në Shqipëri dhe rajon", - kështu shprehet një prej emigrantëve shqiptar, votues në Athinë. "Ndjeshmëria për Vorio-Epirin ka emër: Andonis Samaras. Përkrahni platformën e tij këtë të diel. Votoni Vasili Kikilia".

Ky ishte mesazhi i parë i mbërritur në telefonin e emigrantëve, i cili pasohej nga ky tjetri; "Për një të ardhme më të mirë të Vorio-Epirit dhe të shoqatës tonë në Greqi, si përfaqësues në zgjedhjet lokale me Niko Kaklamanin, kërkoj mbështetjen tuaj. Kirusis Mihalis". Ky i fundit është kryetari aktual i Bashkisë së Athinës. Sipas emigrantëve edhe nëse Demokracia e Re do të kishte pak shanse në zgjedhje, me këtë propagandë që ata bëjnë i kanë humbur votat e tyre. Në listat për zgjedhjet lokale në Greqi përfituan 150 mijë shqiptarë, edhe pse numri i emigrantëve tanë atje është disa herë më i madh. Por në zgjedhjet e 7 nëntorit, u vu re një numër i ulët i shqiptarëve në votime, edhe pse politika u përpoq të bënte shumë propagandë për ta duke qenë se në ishuj të vegjël ata ishin përcaktues të rezultatit.

17 vjet më parë

I pari zyrtar helen që foli publikisht për termin Vorio-Epir ishte ish-kryeministri Micotaqis. Më 14 korrik të vitit 1993 ky i fundit tha se Epiri i Veriut i është bashkangjitur Shqipërisë më 1913, pra në Konferencën e Ambasadorëve në Londër. Pas deklaratës së Micotaqisit të rënë në nivelin e ultranacionalistëve, reagoi politika shqiptare nëpërmjet kryeministrit tonë të atëhershëm, Aleksandër Meksit. "Ky qëndrim i ri, shpreh pretendime ndaj territorit të Shqipërisë dhe është një goditje për stabilitetin në Ballkan. Dua t'i kujtoj kryeministrit grek se viti 1913 ishte viti i copëtimit të Shqipërisë. Në Shqipërinë e sotme nuk ka asnjë pëllëmbë tokë të huaj, dhe s'do të lejojmë askënd të cenojë në këtë drejtim. Përdorimi i fjalës Voio Epir nga kryeministri grek përputhet me strategji destabilizimi global në rajon. Ngritja e pretendimeve territoriale nga ana e Greqisë përveçse dhunon angazhimet bilaterale është në kundërshtim dhe me kartën e KB-së", - tha atëherë në deklaratën e tij ish-kryeministri Meksi. Sipas tij 1913 është viti kur grekët hynë në jug të vendit tonë, ndërsa ne "përfituam" vetëm copëtimin. Ndërkaq, konservatorët e sotshëm në Greqi vazhdojnë ende të përdorin terma të tillë duke pretenduar se me premtimin për ardhmërinë e Vorio-Epirit do të marrin votat e shqiptarëve.

(http://www.balkanweb.com)