Do të kalonin 11 vite, e vite të tjera do të kalojnë, por përsëri populli
amerikan kurrë nuk do të harrojë viktimat në njerëz që humbën jetën më 11
shtator 2001, në atë tragjedi të rëndë që tronditi botën. Çdo qytetar që jeton
në SHBA kujton me dhimbje viktimat në njerëz, kur terroristët islamikë rrëmbyen
avionët e përflakën hapësirën amerikane duke goditur Pentagonin dhe World Trade
Center.
Që nga ajo kohë çdo vit edhe Presidenti i Bashkisë në Bronx Ruben Diaz, Jr.,
inicion ceremoni përkujtimore për nder të 3,000 heronjve që humbën jetën nga ai
krim mbi njerëzor. Me hymnin amerikan ekzekutuar nga banda e New York State
Courts Pipes & Drums dhe shkolla e mesme 390 në Bronx hapi siparin ky
eveniment i rëndësishëm. "Ne kurrë nuk ju harrojmë, e kurrë nuk kanë për t'ju
harruar edhe brezat e ardhshëm. Ju, emrat tuaj dhe buzëqeshjen tuaj". Me këto
fjalë iu drejtua të pranishmëve Presidenti Ruben Diaz, Jr., në sheshin përpara
Gjykatës së Lartë në Bronx, i cili njëherësh në shenjë nderimi e respekti
përmendi edhe 143 emrat e të rënëve në këtë ditë mortore, të cilët ishin
banorë të Bronx-it.
Nga lista u lexuan edhe emrat e tre shqiptarëve që ranë heroikisht në
krye të detyrës Simon Dedëvukaj, Rrok Camaj dhe Mon Gjonbalaj. Ai
përmendi edhe një mikun e shokun e tij të rritur e shkolluar sëbashku,
basketbollistin e njeriun me zemër të madhe që iu mor jeta në mënyrë të
papritur nga njerëz që ispirojnë brenda vetes ligësi, vdekje e krime. Ai kurrë
nuk do të harronte fjalët e intelektin e tij, vullnetin e tij për tu shkolluar
e ecur përpara.
Takimi u përshëndet nga gjykatësi i Gjykatës Supreme Douglas E. McKeon. Ishin
të pranishëm njerëz të politikës amerikane, Senatori i Shtetit Ruben Diaz, Sr.,
Presidenti i Partisë Demokratike në Bronx Carl Hastings, Deputetja Arel Green,
familjarë të viktimave si dhe përfaqësues të shoqërisë civile. Të ftuar
gjithashtu ishin edhe nga komuniteti ynë, Presidenti i Fondacionit Shqiptaro
Amerikan Esad Rizai, gazetari Gjekë Gjonlekaj, fotoreporteri Aleks Nilaj dhe
Organizata e Gruas "Shpresë & Paqe".
Presidenti Ruben Dias Diaz, Jr., ndër të tjera në këtë ceremoni tha: "11
shtatori 2001 ishte ditë votimesh, kur armiqtë goditën Amerikën. Ata duan të
mposhtin shtetin e vendin tonë, por ne qëndruam të fortë, e që nga ajo ditë
jemi bërë akoma më të fortë, më të fuqishëm". Ndërsa në përfundim të fjalës së
tij tha: "Rroftë populli amerikan, rrofshin Shtetet e Bashkuara të Amerikës",
etj.
Për të pranishmit u dha një Koncert me muzikë e balet klasik, si dhe u shtrua
një koktej në ambjetet e godinës së Bashkisë. Lutjet fetare u mbajtën nga
Reverend Joel Bauza.
Comments (0)
Dërgoja shokut
Printo
