GREQI - Do të çuditeshit po të mësonit se në radhët e "Agimit të
Artë" në Greqi, militon edhe një njeri që ka lindur në Shqipëri?
Ai quhet Robert dhe ka zgjedhur të sqarojë pozicionin e tij duke replikuar me
lexuesit e blogjeve, të cilët e akuzojnë se është "shqiptar".
Në sqarimin e tij, Roberti tregon për prejardhjen, fëmijërinë dhe rininë e tij
dhe për arsyen përse u largua nga Shqipëria drejt Greqisë, ku ka dashur të
pagëzohet sërish, por nuk ka mundur.
"Emri im është Robert, jam biri i Thomait dhe Athinasë, nipi i Antonit dhe
Sotirës dhe stërnip i Aristidhit dhe Penelopës. Kam lindur në Sarandë dhe u
rrita në fshatin Lukovë të Himarës, një vend i Epirit me një histori
4000-vjeçare", - shkruan Roberti. "Kur isha në moshën 1-vjeçare u pagëzova
me këtë emër dhe kur shkova në Greqi kërkova të pagëzohesha përsëri, por
Gerasimos, ati im shpirtëror në Agrinio, që më njeh shumë mirë mua dhe familjen
time, më tha se nuk lejohet pagëzimi i dytë. Kam marrë pjesë në kampionatin e
peshëngritjes në nivel profesional, kam studiuar dhe kam 2 diploma universiteti
për Agronomi dhe Fizkulturë dhe kam punuar si mësues në Delvinë. Kur në
Shqipëri sundonte regjimi komunist, kërkova azil politik në Greqi me
pretendimin se "jam armik i regjimit komunist në Shqipëri". Në vitin
1991 u martova në ishën e Shën Kristoforit në Agrinio.
Gruaja ime është greke nga Agrinio dhe ka një biznes, që në moshën 20-vjeçare.
Në Shqipëri mediat më kanë akuzuar si nacionalist grek dhe tani papritmas në
Greqi akuzohem si shqiptar. Ata që më akuzojnë mua, janë ata që shiten
Vorioepirin te shqip-tarët, ata që nuk respektojnë protokollin e Korfuzit të
vitit 1914 dhe që nuk e tregojnë kurrë fytyrën e tyre. Unë jam Vorioepirot dhe
do të luftoj për vendin tim deri në vdekje".
Kështu e përfundon deklaratën e tij Roberti, i cili ka postuar gjithashtu edhe
një foto të tij, me një bluzë ku është stampuar një kryq i madh i thyer, simbol
i Hitlerit, të cilin simpatizantët e "Agimit të Artë" e kanë
udhëheqës shpirtëror.
"Agimi i Artë" ka në programin e vet një "Greqi të pastër"
dhe të huajt janë armiqtë e tyre më të betuar. "Agimi i Artë" privon
të huajt nga ndihmat ushqimore që shpërndan për personat në nevojë, nga gjaku
që dhuron nëpër spitale dhe ç'është më e keqja i dhunon ata fizikisht dhe
psikologjikisht dhe vetëm ditët e fundit qeveria greke u vu në lëvizje duke
urdhëruar arrestime, qoftë edhe të deputetëve të kësaj partie në rast të dhunës
raciste.
Comments (0)
Dërgoja shokut
Printo
