VOAL - Online Zëri i Shqiptarëve

BRITANIA DO TË TRANSFEROJË NË ATDHE 200 SHQIPTARË TË DËNUAR Të dënuarit për krime të rënda do vendosen në Krujë, Korçë dhe Peqin E Djelë, 11.17.2013, 04:10pm (GMT1) Britania do të transferojë në Shqipëri rreth 200 të burgosur shqiptarë për krime të rënda. Burimet zyrtare thonë se duke nisur nga java që vjen një numër i konsiderueshëm të dënuarish shqiptarë që janë mbajtur deri tani në Britani do të transferohen me grupe të ndara në vendin tonë. Lajmi është bërë me dije nga Drejtoria e Përgjithshme e Burgjeve, e cila informoi se marrëveshja është arritur së fundi mes Shqipërisë dhe Britanisë së Madhe, pas negociatave disamujore mes autoriteteve të Drejtësisë. Barrën kryesore në zbatimin e operacionit të transferimit të të dënuarve shqiptarë në Britani pritet ta ketë Interpoli dhe Drejtoria e Përgjithshme e Burgjeve. Duke nisur nga java e ardhshme sipas një grafiku të caktuar drejt Shqipërisë do të transferohen në grupe të vogla rreth 200 persona që ndodhen aktualisht në burgjet britanike. "Të gjithë këta persona janë të dënuar në Britani ose jashtë saj për krime të rënda dhe janë arrestuar brenda këtij shteti", kanë bërë të ditur burimet zyrtare. Sipas tyre, negociatat me palën britanike për transferimin e të dënuarve në Shqipëri kanë qenë komplekse dhe të detajuara. MARRËVESHJA Marrëveshja për transferimin nga Britania të shqiptarëve të dënuar atje është nënshkruar në janar 2013 gjatë një vizite të ministrit të asaj kohe të Drejtësisë, Eduard Halimi. Marrëveshja, e cila u negociua në detaje për mënyrën e zbatimit të saj deri pak ditë më parë nga ministri i Drejtësisë, Nasip Naço, parasheh transferimin e dyanshëm të të dënuarve, duke përfshirë edhe shtetasit britanikë që ndodhen në burgjet shqiptare, të cilët dërgohen në atdheun e tyre. Sipas marrëveshjes, e vetmja gjë që do të ndryshojë për shqiptarët që do të vijnë nga Britania është vendi i vuajtjes së dënimit. "Qëllimi i marrëveshjes ka qenë transferimi i të burgosurve për të vuajtur pjesën e mbetur të dënimit në vendin e tyre më pranë familjarëve të tyre dhe më parë mundësisë për të qenë pjesë e kësaj shoqërie ose për t'u riintegruar më lehtë", kanë thënë burimet nga Drejtoria e Burgjeve. Sipas tyre koha e dënimit mbetet e njëjtë duke u njohur pjesa e vuajtur jashtë vendit. TRANSFERIMI I TË DËNUARVE Dhjetë shqiptarët e parë që ndodhen në burgjet e Mbretërisë së Madhe pritet të mbërrijnë javën e ardhshme në Tiranë. Para transferimit të tyre, zyrtarët britanikë kanë kërkuar informacion në lidhje me burgjet ku do të vendosen personat në kontingjentin e transferimit. Ata kanë kërkuar që burgjet në fjalë të ofrojnë kushtet e përshtatshme dhe sigurinë maksimale. Në këtë mënyrë, mësohet se Drejtoria e Përgjithshme e Burgjeve ka vendosur që të vendosë në Burgun e Fushë-Krujës, atë të Peqinit dhe të Korçës, kontingjentin e parë të të dënuarve të mbërrijnë nga Britania ditët në vazhdim. Sipas burimeve zyrtare mësohet se përcaktimi i burgut ku do të vendosen personat do të bëhet mbi bazën e rrezikshmërisë së veprës për të cilën janë dënuar dhe masës së dënimit të dhënë ndaj tyre. Tashmë në Tiranë mësohet se ka mbërritur lista e personave që do të transferohen dhe javën e ardhshme pritet të nisë operacioni. Transferimi i personave pritet të bëhet në linjë ajrore nga oficerët e Interpolit, të cilët do t'i marrin të dënuarit në dorëzim nga burgjet britanike dhe t'i dorëzojnë në Rinas, te Policia e Burgjeve shqiptare. www.voal-online.ch

Copyright © 2005-2008 Nulled by [x-MoBiLe]. All rights reserved.