Nju Jork, 2 nëntor - Kryetari i Degës së Lidhjes Demokratike të Dardanisë, (LDD) në Nju Jork me Rrethe, Agim Rexhaj, ka dhënë dorëheqje të parevokueshme nga ky post. Në tekstin e dorëheqjes që i është drejtuar liderit të LDD, Nexhat Daci, Rexhaj thotë se jep dorëheqje për shkak të qëndrimeve të papranueshme "të cilat në thelb, janë në kundërshtim me frymën, me statusin dhe programin e LDD së dhe, mbi të gjitha, në kundërshtim të plotë me frymën dhe filozofinë rugoviane të komunikimeve e të qëndrimeve demokratike".

Gjithashtu Rexhaj pohon se sjellja dhe qëndrimi politik i Dacit ka vazhduar të "shfaqet si sjellje dhe qëndrim arbitrar", sidomos gjatë vizitës së tij të fundit në SHBA. Duke mos dashur t'i nxjerrë jashtë problemet e tjera të brendshme lidhur me sjelljen dhe qëndrimet e kreut të LDD-së, Rexhaj thotë se fryma e komunikimit të Dacit është në kundërshtim me mendimin demokratik.

"Duke mos dashur të jemi në shërbim të arbitraritetit politik e partiak të individit, por të programit partiak, politik e kombëtar, duke mos dashur të jemi në shërbim të mentalitetit i cili refuzon frymën demokratike të komunikimeve, të bashkëpunimeve e të veprimeve të përgjegjshme, ua them se dorëheqja ime nga pozita e Kryetarit të Degës së LDD së për New York me Rrethe është e parevokueshme", shkruan në dorëheqjen e tij Agim Rexhaj. (http://www.kosova.com)