"Nuk besoj që mesazhi i John Lenon të jetë plakur ndonjëherë. Nuk është
një ekspozitë e bazuar në nostalgji. Mendoj se mesazhi i paqes të cilin
dëshironim të shpallnim atëbotë, është edhe sot tejet aktual." Yoko Ono, 76
vjeçe, e prezanton kështu ekspozitën që përurohet në Montreal, me rastin e
dyzetvjetorit të "Bed In", protestës së bujshme dhe paqësore të cilën ajo dhe
Lennon vunë në skenë më 1969 kundër luftës në Vietnam. Ajo nënvizon se largësia
kohore midis asaj ngjarjeje dhe ditëve të sotme është e papërfillshme. "Nuk
jemi këtu për të kremtuar diçka që ka ndodhur, por për të vazhduar të përhapim
të njëjtin mesazh, sepse është ende koha e veprimit. Dhe veprimi i drejtë është
dërgimi i paqes në gjithë botën. Janë shumë mënyra për ta bërë, secili mund të
ndihmesojë për të bërë që bota të jetë më paqësore. Para së gjithash duke përfytyruar
paqen, duke menduar për paqen çdo ditë. Të përfytyruarit krijon realitetin, kur
e bën dendur krijon paqen, nëse e bëjnë të gjithë vërtetë përditë, atëherë gjithë bota do të jetë më
paqësore."
PYETJE: Duhet ta bëjnë para të gjithëve politikanët...
YOKO ONO: "Jo, politika më intereson në mënyrë relative, sepse politikanët janë
pasqyrim i asaj që ne bëjmë. Unë besoj në lëvizjet që nisin nga poshtë. E të
parët ne duhet të besojmë se është e mundur të ndryshojmë dhe ta krijojmë
paqen. Të përfytyruarit është gjithsesi një gjë meditative. Por kur përfytyron
paqen nuk mund të vrasësh askënd, duke përfytyruar paqen, ti bëhesh paqja. Më
shumë se nëntëdhjetë për qind e njerëzve të botës dëshiron paqe, pse duhet t'i
përshtatemi dhjetëpërqindëshit tjetër? Njerëzia ka shumë më tepër pushtet sesa
beson. Pjesa më e madhe e trupit tonë është bërë prej ujit, ne jemi të lidhur
me njëri tjetrin me ujë, ne jemi ujë. Nëse gjërat nuk shkojnë mirë, do të thotë
se uji ynë nuk është i pastër. Secili prej nesh mund ta pastrojë hapësirën e
vet, veten, ujin e vet, dhe kjo mund të çojë që ne të kemi ujë të pastër, ide
të pastra, një botë të pastër, mjafton që secili prej nesh të nisë të mendojë
në mënyrë paqësore."
PYETJE: Mesazhi i John është ende i drejtuar ndaj breznive të më të rinjve?
YOKO ONO: "Po. Atëherë bëmë "bed in", sepse ishte një mënyrë
rivolucionare për ta dërguar mesazhin tek të rinjtë, ishte një mënyrë që t'i
bëjmë të kuptojnë se të gjithë mund ta bënin, një mënyrë paqësore për ta
shpaluar paqen. Besoj se të rinjtë sot mund të bëjnë të njëjtën gjë."
PYETJE: Çfarë kujtimesh keni nga ajo javë në Montreal 40 vjet më parë?
YOKO ONO: "Kujtime shumë të mira, shumë intime. Ishte muaji ynë i mjaltit,
kishim pak që ishim martuar. Kujtoj, për shembull, që ishte një hënë shumë e
bukur dhe kur të gjithë largoheshin, unë dhe John rrinim gjatë për ta parë
qiellin."
PYETJE: Po ishte edhe një manifestim politik, një deklaratë e fortë kundër
luftës.
YOKO ONO: "Po, natyrisht. Po për ne ishte i rëndësishëm edhe gjesti artistik,
ishte e rëndësishme mënyra me të cilën shpalonim mesazhin, mënyra më paqësore e
të gjithave, duke qëndruar në shtrat, duke vënë në skenë vetëm dashurinë. E
klima rrotull nesh ishte vërtetë fantastike."
PYETJE: Në Montreal, në dhomën e Queen Elizabeth, kini regjistruar
"Give Peace a Chance"...
YOKO ONO: "Ka qenë fantastike, nuk doli asnjë problem. Kujtoj fnasat të
grumbulluar poshtë hotelit, dhoma plot me njerëz, teknikë, e sidomos të gjithë
ata që punonin në hotel, të cilkët qenë tejet të sjellshëm e të gatshëm. Ishte
një moment i veçantë i historisë, ne kemi qenë shumë me fat, bënim diçka me
dashuri dhe kishim rrotull nesh dashuri. Ishte një shkëmbim dashurie me
njerëzit üranë nesh, rrotull nesh, e në botë."
PYETJE: Ato ditë u bënë tejet të
rëndësishme për ju e Lennon.
YOKO ONO: "Mund të themi se vibracionet që kemi marrë atë javë kanë ndihmesuar
rilindjen tonë. Montreal u bë për mua një vend shumë i rëndësishëm, sepse u bë
pjesë e jetëve tona. E di që John është i kënaqur të ndodhet këtu pranë meje."/Elida
BUÇPAPAJ
Comments (0)
Dërgoja shokut
Printo
