Qysh në filmin e tij të parë "Plastic Planet" regjisori austriak Werner
Boote shtronte pyetje jo komode dhe paralajmëronte nga pasojat e
konsumit të pakontrolluar të plastikës. Si reagim ndaj këtij filmi shumë
spektatorë i thanë atij, se kjo ndodh pasi ka shumë njerëz e si pasojë
edhe shumë mbeturina. Por Boote të gjitha këto i konsideron si pretekst.
A jemi ne vërtetë kaq shumë? E nëse është kështu, atëherë cili prej
nesh është i tepërt? "Unë nuk gjeta askënd, që të përgjigjej seriozisht
dhe pa përçmim ndaj njerëzve, lidhur me këto pyetje", thotë Boote në
intervistë për DW. Për të shtrohet një çështje krejt tjetër: Kush dhe
çfarë po e nxit një skenar të tillë katastrofal?
Për të gjetur përgjigjen e kësaj pyetjeje, Boote
ka udhëtuar nëpër qendrat perëndimore të pushtetit dhe të financave,
nëpër slum-et gjigante dhe në hapësirat pafund të zbrazura prej njerëzve
të Afrikës. Në fazën e parë të këtij udhëtimi ai vizitoi Nju Jorkun.
Skenë nga dokumentari "Population Boom"
Është 31.10.2011 Halloween,
festa në të cilën përkujtohen të vdekurit. Pikërisht këtë ditë kishte
zgjedhur OKB-ja për të komunikuar lindjen e banorit të shtatëmilardtë të
botës - E kjo u bë duke tërhequr njëkohësisht vëmendjen për luftën
kundër ndryshimit të klimës, emergjencën nga uria, thjeshtë pra ndaj
"problemit të mbipopullimit". Lindja e një qytetari tjetër të uritur -
thjesht si një gozhdë më shumë për varrin e planetit tonë?
Rritja e popullsisë botërore ka arritur në zenitin e vet
"Mendimi për mbipopullim është një botëkuptim i mbetur në vendnumëro, i
cili është ngulitur tashmë në kokat tona qysh në vitet 1970", shpjegon
Boote. Në 1974 OKB-ja prezantoi një agjendë kundër mbipopullimit,
iniciuar nga SHBA-ja. Shteteve me rritje të lartë popullsie, si Kina,
Meksika apo India iu
imponua që t'i kufizojnë kuotat e lindshmërisë. Nga njëra anë këto
norma u zbatuan përmes masave detyruese si sterilizimet apo ndjekjet
penalisht, dhe nga ana tjetër edhe përmes joshjeve si aksesi në
shërbimet publike apo mundësitë për arsimim. Edhe sot e kësaj dite ende
përdoren këto forma - si p.sh. në shtetin federal indian Rajasthan, ku
grave, që pranojnë të sterilizohen u dhurohet një pajisje kuzhine,
mikser. 37% e të gjitha sterizilimeve në botë kryehen në Indi.
Skenë nga dokumentari "Population Boom"
Sipas Boote frika nga mbipopullimi në vitet 1970 ishte më e kuptueshme se
sa sot: "Asokohe nuk dihej, që rritja e popullsisë do të kishte një
fund." Studiuesit vlerësojnë, se popullsia në mes të këtij shekulli
arrin kulmin e saj me 9,6 miliardë. Pas kësaj ajo sërish do të jetë në
rënie. "Është interesante, që kjo tashmë dihet prej disa vjetësh por në
media ky fakt nuk përmendet, ose vihet shumë rrallë në dukje."
Problemi është gjithmonë tek tjetri
Filmi i Bootes bazohet mbi një punë hulumtimesh dhe xhirimesh voluminoze
për rreth dy vjet. Ai vetë e pranon, se nëse do t'i duhej të punonte
nën presion kohe ndoshta edhe mund të kishte ripërsëritur ndonjë nga
frazat, që propagandohen rëndom kryesisht prej OKB-së dhe Bankës
Botërore. Kjo nisur nga fakti, se është më e thjeshtë që ta përdorësh si
pretekst tezën e mbipopullit, se sa të të duhet ty vetë të bësh diçka:
pra, jo unë, por të tjerët janë shumë dhe ata krijojnë probleme.
"Thelbi i çështjes është frika prej ndarjes", thotë Boote. "Nuk është
mungesa e burimeve arsyeja për urinë dhe varfërinë, por ndarja e
padrejtë dhe mungesa e drejtësisë sociale." Gjatë filmit të forcohet
gjithnjë e më shumë kjo bindje. Në këtë film mëson, se si vetëm
Pentagoni konsumon çdo ditë më shumë naftë se e gjithë Suedia - vendet e
varfëra me kuota të larta lindshmërie përkundrazi konsumojnë sasinë më
të vogël të lëndëve djegëse fosile - ose që vetëm Sudani, ka potencialin
që të ushqejë një miliardë njerëz. E këta janë pikërisht po aq shumë
njerëz, sa ç'është edhe numri i atyre që vuajnë sot nga uria. Por vlen
të shtohet edhe fakti, që 1,5 miliardë njerëz vuajnë nga mbipesha.
Gjithashtu në botë ka mjaft vend, siç tregon përllogaritja e Bootes:
"Nëse ne të gjithë njerëzit e botës, do t'i sillnim në Austrinë e vogël,
atëherë secili prej nesh do të kishte në dispozicion një sipërfaqe prej
11 metrash katrorë. Pra më shumë, se sa kur je i izoluar në burgim të
përjetshëm, ku ke hapësirë vetëm 9 metra katrorë."
Një apel për më shumë humanizëm
Werner Boote në Japoni -dokumentari "Population Boom"
Filmi përfundon me një skenë emocionale. Në Tongi, në Bangladesh pesë
milionë myslimanë pas përfundimit të takimit vjetor Biswa-Ijtema,
shpërndahen duke iu drejtuar mjeteve të qarkullimit urban për të shkuar
në shtëpi. Një skenë kjo, që gazetarët në mbarë botën e preferojnë për
të ilustruar problemin e "mbipopullimit". Boote futet vetë mes kësaj
mase dhe udhëton në mes të turmës së njerëzve mbi çatinë e një treni të
tejmbushur. "Fillimisht pata një panik të tmerrshëm, se do të
rrëzoheshim e të do të vdisnim të gjithë", thotë regjisori. Por në fakt
ai përjetoi diçka, që ia bëri atij këtë udhëtim si një ndër çastet më
fatlume që askush të mos dëmtohej në mënyrë të vetëkuptueshme njerëzit
e mbanin fort njëri-tjetrin. "Unë kuptova, se pavarësisht, se sa njerëz
jemi ne, e rëndësishme është se si sillemi ne me njëri-tjetrin."
Kësisoj "Population Boom" është jo vetëm një apel për më shumë drejtësi
sociale, por edhe për më shumë humanizëm. E rëndësishme është t'i vemë
gishtin kokës për të kuptuar drejtimin në të cilin ne po zhvillohemi.
Gjithashtu ky është një apel për të qenë aktiv, "sepse bum do të thotë
tek e fundit zhvillim." (DW)