Voal-online Filmi i fuqishëm dramë me temën e burgut i regjisorit Jacques Audiard. A Prophet (Një profet) triumfoi në çmimet "Cesar" mbrëmë, duke rrëmbyer çmimet e filmit më të mirë, të aktorit më të mirë dhe të regjisorit më të mirë në versionin e përvitshëm francez të Oskarëve.
"A Prophet", një nga filmat më të bujshëm të Kanës së vitit të shkuar, qe shpallur si filmi më i mirë i huaj në çmimet britanike BAFTA javën e shkuar dhe është në garë në të njëjtën kategori, i kandiduar për një Academy Award (Oskar), më 7 mars.
Një subjekt i errët i një krimineli në moshë të re dhe pa shkollë, i cili ngjitet rrufeshëm në hierarkinë brutale të një burgu, mori nëntë çmime mbrëmë, duke lënë pak gjë për të tjerët.
Audiard, filmat e mëparshëm të të cilit përfshijnë "De battre mon coeur s'est arrete" (Rrahjet e zemrës sime ndaluan), mori çmimin e regjisorit më të mirë, ndërsa aktori kryesor, Tahar Rahim, mori çmimet si aktori më i mirë dhe si talenti i ri më i mirë.
Edhe Niels Arestrup fitoi çmimin e aktorit dytësor për portretizimin e një bosi të modës së vjetër të bandave korsikane që merr në mbrojtje një të ri, i cili do t'ia merrte më vonë komandën e grupit.
Audiard iu shprehu nderime një numri ish të burgosurish të famshëm, të cilët shfaqeshin posaçërisht në film, për t'ia krijuar atij një atmosferë realiste.
Aktorja më e mirë u shpall Isabelle Adjani, një nga aktoret më të shquara franceze, e cila grumbulloi kështu Cesarin e nëntë të karrierës për rolin e luajtur në "La journee de la jupe" (Ditë e ndyrë).
"A Prophet" shumë i suksesshëm në kinematë e Francës, ka pasur një pritje shumë të mirë nga kritika vendëse si dhe nga kritika e publiku i huaj.
Sigourney Weaver dhe Harrison Ford morën çmime të karrierës. Ceremonia përfshinte edhe një nderim për Eric Rohmer, pionier i "New Wave" franceze që e transformoi kinemanë në vitet 1950 e 1960 dhe vazhdoi të bënte filma deri në prag të vdekjes muajin e shkuar në moshën 89 vjeçare./Elida Buçpapaj
Comments (0)
Dërgoja shokut
Printo
