VOAL - Online Zëri i Shqiptarëve - Xheid Gudi ndërroi jetë në gjumë

Voal-online - Jade Goody, aktorja britanike yll e emisioneve reality show, beteja e së cilës kundër kancerit është ndjekur nga mbarë bota, ka vdekur. Ajo vdiq sot, në mëngjesin e së djelës, në Ditën britanike të Nënave. Max Clifford, miku e zëdhënësi i saj, ia bëri të ditur lajmin revistën People. "Ajo ka qenë në gjumë 24 orët e fundit," tha ai duke shtuar se ajo vdiq "pak para orës 4 të mëngjesit". Burri i saj Jack Tweed, me të cilin u martua në një ceremoni të filmuar nga një kanal televiziv britanik në shkurt, dhe nëna Jackiey Budden i ndodheshin pranë deri në momentin e fundit, tha Clifford. Clifford tha se Budden i tregoi atij: "Vajza ime aq tejet e bukur ndërroi jetën në gjumë, u shua." Ai shtoi: "Jackiey, ashtu siç mund ta merrni me mend, si çdo nënë është krejtësisht e dërmuar nga humbja e bijës së saj. Ne e dinim të gjithë se ajo po vdiste, por nëna e saj është e rrënuar." Goody, 27 vjeçe, u bë e famshme në versionin britanik të reality show Big Brother më 2002 dhe pothuaj nuk ka munguar asnjëherë më në gazetat britanike dhe në revistat tabolide, sidomos në rubrikat e gossipeve. Por historia e saj u bë globale kur ajo bëri të ditur se po vuante nga kanceri në qafë, teksa u paraqit në versionin e Big Brother të Indisë në gusht 2008. Në shkurt 2009 ajo mësoi se sëmundja e saj është përhapur në organizëm dhe ka vetëm fare pak kohë për të jetuar. Prej atëherë ajo është marrë me rritjen e ndjeshmërisë ndaj kësaj sëmundjeje dhe është përpjekur si t'i ndihmojë të tjerët, tha Clifford. Ai tha më tej: "Shembulli i saj do të jetë i çmuar për shumë gra, sepse ajo ua theksoi atyre domosdoshmërinë e parandalimit të sëmundjes. Ajo kishte pushtuar zemrat dhe mendjet e shumë njerëzve anembanë botës, nga Australia në Amerikë dhe kudo." Goody e jetoi një pjesë të madhe të jetës së saj përpara kamerave televizive edhe martesa e saj u dha drejtpërdrejt nga televizionet. Kjo ndodhi edhe me rastet e pagëzimeve, në spital, të fëmijëve të saj, Bobby, 5, e Freddy, 4 vjeç. Fill pas ceremonisë, Goody shkoi në shtëpinë e saj në Upshire, Essex, ku beteja e saj për jetën mori fund këtë mëngjes. Brenda pak muajsh do të dalë një libër për jetën e saj.