E Djelë, 10.20.2019, 10:46pm (GMT+1)

Ballina Linqe Stafi Kontakt
 
 
::| Fjala:       [Advance Search]  
 
Gjithë lajmet  
LAJMI I FUNDIT
OPINONE-EDITORIALE
ZVICRA
INTERVISTË-PRESS
SHQIPTARËT
LAJME NDËRKOMBËTARE
POLITIKË
DIASPORA NË ZVICËR DHE BOTË
PERSONAZH
ART KULTURË
DOSSIER
KËNDI I SHKRIMTARIT
HOLLYWOOD
AFORIZMA
GOSSIPE
SPORT
::| Newsletter
Emri juaj:
Emaili juaj:
 
 



 
INTERVISTË-PRESS
 

Rreziqet për stabilitetin e Maqedonisë

Nga Isuf Kadriu


E Martë, 08.18.2009, 03:11pm (GMT+1)

 

 

Maqedonia rrezikohet nga destabilizimi nëse nuk ndërmerren masa për parandalimin e incidenteve ndëretnike, vlerësojnë ekspertët dhe organizatat joqeveritare, duke komentuar rrahjen masive ndërmjet shqiptarëve dhe maqedonasve në një lagje të Shkupit.


Ekspertët dhe organizatat joqeveritare kanë shprehur shqetësimin e tyre lidhur me incidentet ndëretnike në Shkup. Ata kërkojnë nga organet shtetërore vigjilencë në menaxhimin e këtij rast, që të mos marrë përmasa edhe më dramatike, e që situatën do ta nxirrte jashtë kontrolli.

“Baza e qytetarëve po kontaminohet me helm ndëretnik; do të thotë, me mostolerancë ndëretnike. Kur të rinjtë e urrejnë njëri-tjetrin, atëherë çfarë shoqërie mund të zhvillojmë ne këtu në Maqedoni?! Mendoj se autoritetet duhet të reagojnë dhe Ministria e Brendshme menjëherë t’i arrestojë këto grupe huliganësh, që dogjën edhe flamurin shqiptar në stadiumin e qytetit dhe për çdo muaj bëjnë nga një incident ndëretnik në vend”, tha Artan Grubi, kryetar i Lëvizjes Qytetare “Zgjohu”.

Në këtë drejtim, Mirjana Malevska, ligjëruese universitare dhe njohëse e raporteve ndëretnike në Maqedoni, tha se fajtorët e këtij incidenti patjetër duhet të nxirren para drejtësisë.

“Në një shoqëri çdoherë mund të paraqiten dukuritë ekstremiste, por me këtë rast është shumë me rëndësi që shteti, dhe organet e tij siç është dhe policia, t’i gjejë fajtorët dhe t’i nxjerrë para drejtësisë, pasi vetëm në këtë mënyrë mund të dëshmojë se kujdeset njësoj për të gjithë qytetarët, pa marrë parasysh përkatësinë e tyre etnike”, tha Malevska, duke ftuar para së gjithash liderët e partive politike që të punojnë në favor të tolerancës dhe të përmbahen nga fjalori i tyre i nxitjes, pasi në situata të këtilla, sipas saj, mjafton një inkurajim i vogël i cilësdo palë që situata të rëndohet edhe më tej.

“Duhet të punohet shumë në krijimin e një atmosfere tolerante dhe këtë, para së gjithash, duhet ta bëjnë liderët politikë, të përmbahen nga fjalori i tyre ekstremist, të përmbahen nga shfrytëzimi i ndjenjave nacionale të qytetarëve për qëllime të ulëta politike, duke mos mbajtur llogari me këtë rast se mund t’i dëmtojnë rëndë marrëdhëniet ndëretnike, e me këtë edhe stabilitetin e shtetit”, deklaroi Mirjana Malevska.

Ajo shtoi se rasti i konfrontimit në baza nacionale në Lagjen Nerez të Shkupit është edhe një fakt i dhimbshëm, se edhe 8 vjet pas përfundimit të konfliktit të armatosur dhe arritjes së Marrëveshjes paqësore të Ohrit, në Maqedoni, sipas saj, ende nuk është arritur të kapërcehen paragjykimet etnike.

Edhe Artan Grubi mendon se gjatë periudhës që nga nënshkrimi i Marrëveshjes së Ohrit, shumë pak është punuar në krijimin e një tolerance të mirëfilltë mes dy grupeve më të mëdha etnike në Maqedoni.

Ai thotë se incidentet janë edhe pasojë e raporteve jo të mira mes partnerëve të koalicionit qeveritar.

Incidenti buron drejtpërdrejt nga marrëdhëniet e këqija ndëretnike, që janë në koalicionin qeveritar mes partnerëve maqedonas dhe shqiptarë. D.m.th. injoranca që partneri maqedonas u bën marrëdhënieve ndëretnike, tani ka pasoja tek qytetarët e thjeshtë dhe tek gjithë shoqëria. Më duhet të them se kjo është pasojë e drejtpërdrejtë, pasojë e moratoriumit të shpallur nga ana e VMRO-DPMNE-së në vitin 2006 për marrëdhëniet ndëretnike”, tha Artan Grubi.

Incidentit ndodhi të dielën në mbrëmje, në Lagjen Nerez të Shkupit, kur një grup i maqedonasve etnikë, të quajtur “komitët”, kishte sulmuar banorët shqiptarë të lagjes. Nga sulmet me shufra të hekurit, thika, gurë e sende tjera të forta, nuk ishin kursyer as gratë e fëmijët dhe për pasojë disa prej tyre edhe ishin shtruar në spital.

Policia, e cila ka qenë e pranishme në vendin e ngjarjes, nuk ka ndërhyrë në evitimin e incidentit, i cili ka shkaktuar reagime të shumta si nga partitë politike, ashtu edhe nga qytetarët dhe organizatat joqeveritare.

 

18.08.2009

 

--

 

Thaçi: Gruevski ka për qëllim të shkatërrojë Maqedoninë

 

by Zerijeta Hajro Jahjaga

 

“Maqedonasit e shkatërruan Marrëveshjen e Ohrit. Gruevski e ka qëllimin final që të shkatërrojë Maqedoninë, të shkatërrojë kombin maqedonas”, thotë Menduh Thaçi, kryetar i Partisë Demokratike Shqiptare.


RADIO EVROPA E LIRË
Zoti Thaçi, keni dalë me një ofertë konkrete për një marrëveshje të re shqiptaro – maqedonase, hartuar nga një grup i ekspertëve të profileve të ndryshme. Pse? Mendoni se janë shterur të gjithë mekanizmat për jetësimin e Marrëveshjes së Ohrit, duke e bërë atë jofunksionale?

MENDUH THAÇI
Marrëveshjen e Ohrit, me plot vetëdije, në mënyrë shumë të saktë, e shkatërruan vetë maqedonasit.

Ju kujtohet, që në fillim ata nuk kishin dëshirë që ta nënshkruajnë atë marrëveshje, më pastaj ju kujtohen lëvizjet e ndryshme politike, organizimet e referendumeve kundër kësaj marrëveshjeje dhe mendoj që vitin e kaluar definitivisht arritën që ta shkatërrojnë dhe ta bëjnë të papërdorur.

Kjo politikë e re shumë arrogante nacionaliste, për të mos thënë naciste, e Qeverisë së Maqedonisë, do të nxjerrë në shesh atë që ata nuk heqin dorë prej tendencës për krijimin e shtetit etnik të popullit maqedonas dhe me këtë nuk mund të pajtohemi.

RADIO EVROPA E LIRË
Cili është qëllimi kryesor i marrëveshjes 15 pikëshe shqiptaro-maqedonase dhe ky dokument a parasheh dhe ndryshimin e Kushtetutës së Maqedonisë?

MENDUH THAÇI
Njëherë është konstatimi se Marrëveshja e Ohrit është shkatërruar.

Mandej është argumentimi i pozicioneve të shqiptarëve tejet të degraduara në sistemin e institucioneve dhe më pastaj oferta për secilin sektor – aspektin ekonomik, aspektin e supremacionit ekonomik që bëhet ndaj shqiptarëve, moszhvillimi i njëjtë aty ku jetojnë shqiptarët, organizimi territorial i pushtetit lokal në mënyrë fatale për shqiptarët, çështja e gjuhës, çështja e identitetit për shqiptarët, pasi që maqedonasit, kohët e fundit, e bënë pjesë të politikës shtetërore identitetin e tyre maqedonas, neutraliteti i shtetit, sekuraliteti në aspektin religjioz, por neutraliteti i shtetit edhe në aspektin e mbështetjes së kulturave të këtyre popujve.

Domethënë, shteti duhet të funksionojë në aspekt ligjor dhe kushtetutar, të mos jetë stimulues për njërin etnitet apo komunitet e kështu me radhë.

RADIO EVROPA E LIRË
Nga kush pritni të mbështetet kjo marrëveshje e re mes shqiptarëve dhe maqedonasve dhe a shpie ky dokument drejt federalizimit apo edhe më tej do të insistoni në multietnicitetin e Maqedonisë? Çka nëse ky dokument injorohet nga strukturat relevante politike të vendit?

MENDUH THAÇI

Mund të na injorojnë, flas për forcat politike maqedonase dhe për Qeverinë.

Nuk do të përdorim metoda që të shkelim normat demokratike, por do t’iu lëmë një testament se ky ishte tentimi i fundit i shqiptarëve, i një force politike shqiptare për ta marrë mbi atë, ndoshta tentimi ynë i fundit për ta shpëtuar insistimin e Maqedonisë në këtë variant, edhe pse jam i vetëdijshëm se në start ka kompromis.

Shqiptarët nuk kërkojnë përcaktim territorial të territorit të tyre, por e respektojnë paradigmën e Unionit Evropian të shtetit multietnik.

Do t’u themi që kjo është e fundit; pas kësaj mund të ballafaqohen me atë energji dhe kapacitete të shqiptarëve për të krijuar shtetin shqiptar në këto territore.

Nuk hezitojmë t’ua themi këtë, sepse nga aspekti edhe i përvojës, por edhe i pakënaqësisë që është tek shqiptarët këtu, e shohim se do të vijë deri te ajo.

RADIO EVROPA E LIRË
Është theksuar dhe nga vetë kreu shtetëror se është shtuar presioni si ndaj Shkupit, ashtu dhe Athinës zyrtare, nga ana e komunitetit ndërkombëtar që sa më parë të zgjidhet kontesti rreth emrit.
A mund të thuhet se ky proces shkon kah finalizimi?

MENDUH THAÇI
Greqia nuk ka kurrfarë presioni, Greqia nuk humb asgjë. Greqisë nuk i kushton kjo betejë, Maqedonisë i kushton, Greqisë i kushton vetëm një deklaratë.

Problemi është se formulimi është gabim. Nuk është ky problem bilateral, nuk është ky problem i Maqedonisë me Greqinë. Ky është problem i Maqedonisë me NATO-n, problem i Maqedonisë me Unionin Evropian.

Tentimi i qeverisë për ta zbritur në nivel bilateral tregon paaftësi të kuptimit të problemit.

RADIO EVROPA E LIRË
Si e shihni rolin e shqiptarëve në zgjidhjen e këtij kontesti?

MENDUH THAÇI
Aspekti parimor i qasjes që kanë pasur shqiptarët drejt problemit të emrit, mendoj se tashmë nuk do të jetë.

Ne i lamë një kohë të gjatë maqedonasit që të vendosin ata vetë, nuk duket se ne jemi të njëanshëm.

Por, më duket se ajo përfundoi me një përçarje të fuqishme brenda shoqërisë maqedonase dhe besoj se Gruevski është ai që e stimuloi këtë përçarje.

Ai e ka qëllimin final që të shkatërrojë Maqedoninë, ai ka qëllimin final që të shkatërrojë kombin maqedonas.

RADIO EVROPA E LIRË
Zoti Thaçi, sipas jush, pse zvarritet procesi i vendosjes së marrëdhënieve diplomatike me Kosovën?

MENDUH THAÇI
Gruevski, në momentet më të rënda, më të vështira historike të maqedonasve, i nxit shqiptarët për t’i armiqësuar me shqiptarët. Ky është fatalitet për Gruevskin.

Nxitja permanente që u bën shqiptarëve që të armiqësohen, është një politikë fatale, shumë e dëmshme.

Flas për acarimin Gruevskit që e bën me të gjithë shqiptarët, me shqiptarët e Maqedonisë, me shqiptarët në Kosovë, me shqiptarët në Shqipëri; është një politikë shumë e gabuar.
27. 06. 2009
www.voal-online.ch


Rating (Votes: )   
    Comments (0)        Dërgoja shokut        Printo


Other Articles:
Nuk ka instalim të komunave paralele serbe (08.18.2009)
"Reader's Digest", falimentimi i një ikone të vjetër (08.18.2009)
Sarandë, tani edhe në Krorzë ka jetë (08.18.2009)
Bregdeti i Jonit pushtohet nga jahtet dhe motorët e ujitNga Elis Kuçi (08.18.2009)
Jehona e mesazhit të Rusisë për UkrainënNga Robert Coalson (08.17.2009)
Rreziqe te fqinjët - deficitet e zhvillimit në vendet arabe duhet t'i interesojnë Evropës (08.17.2009)
Zgjedhjet serbe forcojnë strukturat paralele? (08.16.2009)
Wall Street Journal: Putini godet Radion Evropa e Lirë (08.15.2009)
Forbes: Analogjia mes Jugosllavisë dhe GjeorgjisëNga Melik Kaylan (08.15.2009)
Reporterët pa Kufij mbi sulmet ndaj "Ekspresit" (08.15.2009)



 
::| Lajme të fundit
::| Kalendari
Tetor 2019  
D H M M E P S
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    
 
::| Hot News
SA MBRAPA KA MBETUR UEFA... MJAFT U PËRKËDHEL SERBIANga OWEN GIBSON, The Guardian
KADARE - NUK IU JAP RËNDËSI XHUXHËVE DHE SPIUNËVE
Intervistë ekskluzive e shkrimtarit Ismail Kadare dhënë Vehbi Bajramit, botues i gazetës “Illyria” në New YorkISMAIL KADARE - DOKTRINA ANTISHQIPTARE E SERBËVE DO PËRMENDUR, SEPSE DOKTRINA KA MBETUR GJER MË SOT E PADËNUAR
DOLI NË QARKULLIM LIBRI I RI POETIK I ELIDA BUÇPAPAJT "RAPSODI E GOLGOTËS SË TRANZICIONIT"
PËRSHËNDETJA E PRESIDENTIT OBAMA NË RASTIN E 70 VJETORIT TË ZËRIT TË AMERIKËS
TRUPAT AMERIKANE NË KOSOVË NUK E ZVOGËLOJNË NUMRIN DERI NË MESIN E VITIT TË ARDHSHËM
Intervistë dhënë gazetës IllyriaISMAIL KADARE: Krimet serbe nuk mund të lihen në harresë në emër të paqësimit të gadishullitIntervistoi: Vehbi BAJRAMI

 
VOAL
[Shko lart]