KADRI VESELI - ENDE NUK DIHET KUR DO TA MIRATOJMË GJYKATËN SPECIALE
E Martë, 05.05.2015, 10:15am (GMT+1)
Kuvendi i Kosovës nuk është ende i gatshëm ta miratojë formimin e Gjykatës Speciale për krimet e luftës në Kosovë.
Edhe pse Gjykata Kushtetuese ka
vlerësuar se amendamentet, që do ta ndryshojnë Kushtetutën e Kosovës
mund të miratohen nga Kuvendi, institucioni më i lartë në vend, së paku
edhe këtë javë nuk do t'i shqyrtojë dhe miratojë ato në seancë.
Pas mbledhjes së Kryesisë, Kryetari i Kuvendit, Kadri Veseli tha se
amendamentet kushtetuese do të vijnë në seancë parlamentare sapo të
kalojnë të gjitha procedurat e nevojshme. "Ne si Kuvend kemi
marrë përgjigje pozitive nga Gjykata Kushtetuese. Tashmë e kemi
proceduar në bazë të rregullores edhe te komisioni parlamentar. Presim
një shqyrtim nga ai dhe më pas do të procedojmë. Ajo që është kryesore, e
theksoj, është ruajtja e konsensusit nacional rreth kësaj çështjeje
dhe, në të njëjtën kohë, ruhet edhe partneriteti me bashkësinë
ndërkombëtare", tha Kadri Veseli, Kryetar i Kuvendit.
Kryeparlamentari kosovar tha se, Kuvendi nuk ka presion nga
ndërkombëtarët për t'u ngutur në ndryshimet kushtetuese për Gjykatën
Speciale. Veseli ka njoftuar gjithashtu se, në Kryesinë e Kuvendit kanë
vendosur që këtë javë të ketë seancë, e cila do të zgjasë më shumë se
një ditë për shkak të numrit të madh të pikave në rendin e ditës.
"Janë 31 pika të rendit të ditës. Seanca plenare do të mbahet,
pikërisht për këtë arsye, të mërkurën nga ora 10. Pastaj në bazë të
nevojave do ta vazhdojmë edhe të enjten, edhe të shtunën. Janë 14
projektligje. Është lajm i mirë, për arsye se kemi filluar të
përqendrohemi te ligjet. Në të njëjtën kohë, janë edhe disa raporte,
afërsisht 10. Do ta bëjmë përzgjedhjen e Bordit për Minierat dhe
Mineralet", tha kryeparlamentari Veseli. Gjatë seancës parlamentare do të shqyrtohet edhe peticioni i qytetarëve kundër ngritjes së çmimit të energjisë elektrike.
/ Top Channel
WWW.VOAL-ONLINE.CH
|