Evakuohet kancelarja pas një bombe të Luftës II 100 metra larg apartamentit të saj
E Djelë, 04.26.2009, 02:11pm (GMT+1)
ATSH-AFP/ - Kancelarja gjermane, Angela Merkel u detyrua të evakuohej nga apartamenti i saj në qendër të Berlinit gjatë fundjavës pas zbulimit aty pranë të një bombe të pashpërthyer të Luftës së Dytë Botërore. Bomba prej 100 kilogramësh e prodhimit sovjetik sipas policisë, u zbulua të premten nga punëtorët në Ishullin e Muzeve, qendër e klasifikuar në pasurinë e Njerëzimit të UNESCO-s, në qendër të Berlinit. Zona u mbyll për qarkullimin, transportet publike, shfaqjet e teatrove u pezulluan, ndërsa shumë banesa në zonën pranë, përfshi edhe atë të kancelares u evakuuan për të mundësuar çaktivizimin e mjetit shpërthyes. Sipas gazetës "Bild am Sonntag", bomba ndodhej vetëm dhjetë centimetra nën sipërfaqen e tokës dhe vetëm 100 metra larg apartamentit të Angela Merkel. Qindra mijëra bomba u hodhën mbi Berlin gjatë Luftës së Dytë Botërore dhe sipas ekspertëve gjetja e bombave dhe municioneve të ndryshme do të zgjasë edhe disa dhjetëvjeçarë.
|