Pamje simbolike

Me përkrahje të fondacionit Friedrich Ebert, Lidhja e Sindikatave të Gazetarëve në Maqedoni ka organizuar një tryezë të rrumbullakët në Shkup, ku është diskutuar për një organizim më cilësor të sindikatave të gazetarëve.

Ata që punojnë në media janë një forcë e kualifikuar që aktivizohet shpesh mbi bazën e profesionit të lirë. Kjo keqpërdoret jo rrallë nga pronarët e mediave. Të këtij mendimi janë në sindikatën e gazetarëve të Serbisë. Në këtë shtet, sindikata është formuar në vitin 2002, por ende ajo nuk ka forcën e duhur për t'i mbrojtur të drejtat e të punësuarve në media, thotë Dragana Çabarkapa, kryetare e sindikatës së gazetarëve në Serbi.

E palejueshme: Gazetarët në dy televizione serbe pa rroga një vit

Në dy mediume private në Serbi , TV5 në Nish dhe në "Svetlost" në Kragujevc, të punësuarit nuk kanë marrë rrogat për një vit, ata janë në grevë. Pronarët nuk i respektojnë ligjet dhe nuk u lejojnë të zhvillojnë grevën. Nuk ka gazetari në profesion lirë pa gazetarë, të cilët nuk kanë guxim të pyesin për rrogat e tyre, kjo është e pakuptimtë, thotë Çabarkapa. Për problemet në media ata kanë informuar edhe federatën evropiane të gazetarëve. "Të organizohemi bashkarisht pët të kërkuar ndihmë, trajnim, të shohim mundësitë e organizimit, sepse me te vërtetë ballafaqohemi me probleme të njëjta. Nuk ka vende demokratike me gazetari të këtillë", thotë Dragana Çabarkapa.

Gjendja e të punësuarve në media në Maqedoni

Në Maqedoni të punësuarit në media në vazhdimësi janë në shënjestër, ndërsa vendet e punës gjithnjë e më shumë po bëhen të pasigurta, një numër i konsiderueshëm i tyre janë të paditur edhe në gjyq." Tamara Çausidis kryetare e sindikatave të mediave në Maqedoni, këmbëngul: "Sindikata jemi të gjithë ne. Nuk është sindikata ndonjë ministri, e cila do t'i trokasë në derë punësdhënësit." Armend Ibrahimi gazetar në televizionin shtetëror TVM, mendon se sindikata e fortë është ajo sindikatë, e cila prapa saj ka anëtarësi besnike. Një riorganizim i sindikatave të gazetarëve është domosdoshmëri e kohës, sipas tij, kjo për shkak të pavarësisë finansiare, por edhe njëkohësisht për shkak të rritjes së cilësisë së punës dhe shërbimeve që i kryejnë gazetarët.

Gjendja në Kroaci më shpresëdhënëse

Në Kroaci gjendja me të punësuarit në media është pjesërisht më e mirë, për të drejtat tyre mund të luftojë sindikata, e cila ekziston më se njëzet vite. Por, kriza ekonomike i ka nxjerrë prapë në sipërfaqe problemet e të së kaluarës. "Punëtorëve nuk u paguhen kontributet për sigurim të detyrueshëm ose nuk u paguhen të ardhurat mujore, ne këto probleme mes tjerash i tejkalojmë me ndihmën e gjyqit. Kemi ankesa në gjyq për mos respektimin elementar të gazaterëve dhe njerëzve të medias dhe lirshëm mund të them se 99% e të ankesave i kemi fituar në gjyq", thotë Marinka Bolkovac nga sindikata e gazetarëve të Kroacisë. Bashkëpunimi dhe organizimi i sindikatave të vendeve të rajonit do të ishte kuptimplotë sepse pothuajse të gjitha vendet përballen me probleme te natyrave të njejta. "Një bashkëpunim i sindikatave mes shteteve të rajonit do të ishte më se i nevojshëm për një rritje të cilësisë së punës edhe në këtë pjesë të Evropës ", shprehet Armend Ibrahimi.

Autor: Fatos Musliu

Redaktoi: Lindita Arapi

(http://www.dwelle.de)

Rating (Votes: )

Comments (0)

Dërgoja shokut

Printo

---