"Zëri": LIMAJ ËSHTË PYETUR NGA EULEX KRYESISHT PËR BURIMET E PASURISË SË TIJ
E Shtunë, 10.15.2011, 09:49am (GMT+1)
15.10.2011 - Marrja në pyetje e deputetit të PDK-së, Fatmir Limaj, rreth dyshimeve për korrupsion sa ishte ministër, nuk ka rezultuar ta ketë sjellë ndonjë fakt a provë që e bëjnë Limajn të dyshuar në këtë rast.
Në disa pjesë dëshmisë që gazeta "Zëri" thotë t'i ketë siguruar, thuhet se Limaj është marrë në pyetje rreth mënyrës së financimit të mbrojtjes sa ka qenë Hagë, për xhirollogaritë e tij, për deklarimin e pasurisë dhe shumë më pak për ministrinë për të cilën kanë filluar hetimet.
Burimi i gazetës brenda Prokurorisë thotë se vetëm në ditën e katërt ai është marrë në pyetje për kohën sa ka qenë ministër i Transportit. Në këtë ditë Limaj ka qëndruar 7 orë e gjysmë në prokurori.
Rreth kësaj çështjeje, Limaj është pyetur për organizimin e ministrisë, mënyrën e funksionimit, ndarjen dhe menaxhimin e buxhetit.
Faktin se ndaj Limajt nuk është gjetur asgjë e ka përforcuar edhe avokati i tij, Tahir Rrecaj.
"Mbetet që prokurori të vlerësojë se a ka nevojë që edhe më tutje ta ftojë Limajn që ta marrë në pyetje, pasi të bëjë analizimin e të gjitha provove që ka grumbulluar deri më tash", ka thënë Rrecaj.
"Nuk mund të jap asnjë lloj komenti lidhur me vlerësimin e provove për shkak se është faza e hetimeve dhe prokurori do të bëjë vlerësimin. Nëse e sheh të arsyeshme se duhet të mbledhë edhe provat tjera, sigurisht do të bëjë kërkesë te Gjykata Supreme për vazhdimin e hetimeve edhe për një periudhë të fundit gjashtëmujore. Nëse jo, atëherë ose do ta pushojë hetimin ose do ta ngrisë aktakuzën". (http://www.koha.net)
www.voal-online.ch
|