Prishtinë, (Kosovapress) 15 Qershor 2012
Policia po zhvillon hetimet për rrethanat e vdekjes së shefit të Agjencisë Kosovare të Privatizimit, Dino Asanaj, i cili ka vdekur dje pas plagëve të marra me thikë në fyt dhe në zemër.
Policia e Kosovës përkatësisht zyrtarët policorë të cilët janë të duke punuar në hetimin e vrasjes së Dino Asanajt po hetojnë në të gjitha pistat e mundshme.
Zyrtari për Informim në Policinë e Kosovës, Brahim Sadriu i tha Radio Kosovës se janë duke u bërë edhe ekzaminimet e provave.
"Zyrtarët policorë të cilët janë të kyçur ne hetimin e këtij rasti janë duke hetuar të gjitha pistat e mundshme të hetimeve. Në këto momente jemi në fazën e ekzaminimit të të gjitha dëshmive dhe provave të gjetura lidhur me këtë rast", tha ai
Nga ana tjetër, drejtori i Institutit të Mjekësisë Ligjore, Arsim Gërxhaliu, ka konfirmuar se trupi i pajetë i Asanajt është vendosur në Institut të Mjekësisë Ligjore, me urdhër të Gjykatës së Qarkut, dhe do t'i bëhet autopsia.
Gërxhaliu tha se Komisioni dhe ekspertet e mjekësisë ligjore mund të përfundojnë autopsinë sot në orët e drekës.
Kryetari i Bordit të Agjencisë Kosovare të Privatizimit, Dino Asanaj, dje, rreth orës 14:00, ka ndërruar jetë në QKUK, si pasojë e plagëve që kishte marrë në fyt dhe zemër nga therjet me thikë.
Presidenca, Qeveria e Kosovës dhe partitë politike kanë dënuar ashpër aktin kriminal të vrasjes së kryetarit të Bordit të Drejtorëve të Agjencisë Kosovare të Privatizimit, Dino Asanaj.