KUMANOVË - "Vdekje për shqiptarët", "Kosova është Serbi", "Kumanova pa shqiptarët" si dhe shenja të emblemës serbe janë përmbajtjet e grafiteve që janë hasur pranë shkollave dhe spitalit gjatë dy ditëve të fundit në lagje qendrore të qytetit të Kumanovës, në Maqedoni.

Agjencia e lajmeve INA raporton se qytetarët janë të indinjuar nga këto akte që nxisin urrejtje dhe se apelojnë që policia të ndërmarrë masat për të gjetur autorët.

"Pjesa më e madhe e grafiteve janë në shkollën "Naim Frashëri" ku janë kamerat e sigurisë pranë shkollës që mund të zbulojnë autorët e këtyre grafiteve", janë shprehur banorët e prekur.

Autoritetet e Ministrisë së Punëve të Brendshme të Maqedonisë nënvizojnë se do të regjistrojnë rastin në terren dhe do të ndërmarrin masat për evitimin e rasteve të tilla provokuese dhe urrejtëse.