Përpjekjet e dëshpëruara e përpëlitëse të "plakut" të rrjedhur e të penalizuar
të PD e qeverisë, për të mbledhur sa më tepër vota, me qëllim për të mbajtur
pushtetin edhe në 23 qershor 2013 e ka detyruar Sali Berishën, të bëjë aleanca
parazgjedhore dhe thirrje për vota ndaj kujtdo dhe i çfarëdo ngjyre politike
qoftë pa dallim, mjafton që të mos shkojnë me opozitën e majtë, duke u premtuar
mandate deputeti e poste pushteti. Dje "plakushi" i dërmuar, i kriminalizuar, i
djallëzuar e i dështuar i PD dhe i pushtetit të degraduar, duke ndjerë fundin e
tij qeverisës e politik dhe përballjen me drejtësinë pas 60 ditësh të ikjes nga
pushteti, ka arritur deri në atë derexhe, sa e ka ulur pjacën, duke nënshkruar
koalicion me një "ushtri" prej 25 partiçkash me lloj emrash e logosh, që kanë
vetëm kryetarët e tyre dhe asnjë anëtar. Por ndërsa "kufoma" politike Sali
Berisha, ua ka shtrirë dorën atyre, ndërkohë që shumë nga këta
kryetarë-partiçka i ka bërë pjesë të qeverisjes 8 vjeçare me kolltuqe joshëse,
si zëvendësministra, drejtorë, ambasadorë etj. Ndërsa të gjithë këta
kryetarë-partiçka, që nuk marrin votat as në familjet e tyre, kanë pranuar të
bëhen pjesë e "stanit" të PD për të mbajtur pushtetin e kolltuqet, një grupim
politik i fortë dhe i mirënjohur si krah i afërt politik i PD, nuk ka pranuar
të bëhet pjesë e mbështetjes së interesave politike familjare e klanore mafioze
të Sali Berishës, duke e sfiduar atë publikisht. Ky grupim i fortë, që e ka
shpërfillur publikisht komunistin Sali Berisha është Shoqata Mbarëkombëtare
"Azem Hajdari". Sipas drejtuesve të kësaj shoqate, kreut të saj Marjan Gryka
dhe Sekretarit Organizativ Gëzim Bara, në zgjedhjet e 23 qershorit, nuk do t'i
jepet asnjë mbështetje PD dhe klanit kriminal e mafioz që ka uzurpuar këtë
parti, me në krye "kokën" e mafies Sali Berisha.
Berisha, lutje shoqatës "Azem Hajdari" për mbështetje në zgjedhje
Ka qenë Sali Berisha, ai i cili dy ditë më parë, ka dërguar "sekserët" e
oborrit të tij, për të kontaktuar me Shoqatën Mbarëkombëtare "Azem Hajdari",
duke i kërkuar asaj mbështetje në fushatën dhe votimet e 23 qershorit 2013. Por
kjo shoqatë, nuk ka pranuar as lutjen dhe as pazaret e Sali Berishës me
premtime për kolltuqe, duke e shpërfillur atë prerazi. Shoqata Mbarëkombëtare
"Azem Hajdari", i ka bërë të qartë uzurpuesit, shkatërruesit dhe
krye-intrigantit të PD, ish-komunist-spiunit Sali Berisha, se ka qenë pikërisht
ai që nuk ka lejuar, madje ka bojkotuar e ka sulmuar deri me dhunë fizike,
krijimin e kësaj shoqate në shtator të vitit 1999. Drejtuesit e shoqatës, i
kanë bërë të qartë dhe i kanë kujtuar "Jagos" së PD, Sali Berisha, faktin se ka
qenë pikërisht ai që ka sulmuar dhe denigruar figurën e Azem Hajdarit në
gazetën "RD" e në media të tjera të paguara. Shoqata e refuzoi dhe e abandonoi
lutjen e Sali Berishës për mbështetje në fushatë e votime, duke i kujtuar se ka
qenë ai që ka inskenuar dhe synuar heqjen e imunitetit të Azem Hajdarit si
deputet në vitin 1992, në vitin 1994, në vitin 1996, duke i organizuar
prapaskena e puçe në parlament, në kryesinë e PD dhe në institucionet ligjore,
deri me synimin për ta futur në burg. Shoqata e refuzoi dhe e abandonoi lutjen
e Sali Berishës për mbështetje në fushatë e votime, duke i kujtuar se ka qenë
ai që e ka nxjerr nga mbledhja natën kur e vranë në pritë 12 tropojanë përpara
selisë së PD. Shoqata e refuzoi dhe e abandonoi lutjen e Sali Berishës për
mbështetje në fushatë e votime, duke i kujtuar se ka qenë dhe është pikërisht
Sali Berisha, ai që ka fshehur provat fizike të vrasjes së Azemit. Shoqata e
refuzoi dhe e abandonoi lutjen e Sali Berishës për mbështetje në fushatë e
votime, duke i kujtuar se ka qenë pikërisht Sali Berisha, ai akuzoi me emra
organizatorët shtetërorë të vrasjes së Azemit, ndërsa prej 8 vitesh "ha e pi"
me ta si mik i ngushtë pazaresh e politikash të pista në krye të PD e qeverisë.
Shoqata e refuzoi dhe e abandonoi lutjen e Sali Berishës për mbështetje në
fushatë e votime, duke i kujtuar se ka qenë pikërisht ai, që i ka vërsulur Azem
Hajdarit, SHIK-un e policinë, për ta përgjuar dhe organizuar atentate eliminimi
fizik nëpër mitingje e rrugët e Shqipërisë. Shoqata e refuzoi dhe e abandonoi
lutjen e Sali Berishës për mbështetje në fushatë e votime, duke i kujtuar se ka
qenë pikërisht dhe vetëm ai, që nuk po shkon në prokurori, të deklarojë dhe të
denoncojë vrasësit e Azemit. Për këto e të tjera qëndrime, Shoqata
Mbarëkombëtare "Azem Hajdari", i tha "JO" bashkëpunimit me PD e drejtuar nga
armiku real i Azem Hajdarit, nga shkatërruesi i PD dhe përdhosësi e tradhtari i
idealeve të studentëve të "Dhjetorit "˜90", të cilët ishin dhe mbeten
themeluesit e vërtetë të PD dhe realizuesit e vërtetë të lëvizjes
anti-komuniste që rrëzoi diktaturën.
Apeli i shoqatës: Asnjë votë për pushtetin e Sali Berishës, armikut të Azem
Hajdarit
Ka qenë Marjan Gryka, kreu i shoqatës "Azem Hajdari" ai që ka bërë thirrje ndaj
anëtarësisë së tij dhe ndaj shqiptarëve, që në emër të idealeve të Azem
Hajdarit dhe të ardhmes së vendit, të mos japin asnjë votë për pushtetin e
mafiozëve dhe horrave që kanë uzurpuar PD dhe asnjë mbështetje për kreun e
kësaj mafieje, shkatërruesin e demokracisë e të PD, komunist-spiunin Sali
Berisha. Shoqata Mbarëkombëtare "Azem Hajdari", tashmë është pozicionuar hapur
kundër Sali Berishës dhe kupolës mafioze që ka uzurpuar PD. Shoqata e
konsideron votën e hedhur për PD, si mbështetje të krimit, si shërbim ndaj
Serbisë, si shërbim ndaj familjes mafioze "Berisha", si vazhdim të mafies
ekonomike të pushtetit që komandon Berisha dhe klanet e tij kriminale. Dje,
Shoqata Mbarëkombëtare "Azem Hajdari", ka deklaruar se nuk do të jetë pjesë as
e fushatës dhe as votës "pro" PD. Këtë qëndrim shoqata e ka motivuar tashmë me
fakte të shumta, të cilat i cituam me lartë. Kaq mjafton, thonë drejtuesit e
shoqatës, që pushteti i Berishës, klanet dhe thirrjet e tij për vota në 23
qershor, të konsiderohen demagogji e mashtrim dhe vazhdim i bllokimit të
integrimit.
Kushti: denonco vrasësit e Azemit, të rishikojmë qëndrim
Shoqata Mbarëkombëtare "Azem Hajdari" edhe pse është treguar e prerë dhe e
ashpër me kërkesën e Sali Berishës për mbështetje dhe vota në 23 qershor 2013,
nuk ka nguruar t'i vendosë atij një kusht të fortë, siç duket për ta vënë në
provë dhe për të verifikuar "besnikërinë" e Sali Berishës, ndaj idealeve dhe
veprës së Azemit. Shoqata i ka kërkuar Berishës, që të shkojë përpara 23
qershorit të bëjë denoncim në prokurori për vrasësit e Azemit, të akuzuar prej
tij në 12 shtator 1998, si dhe të kërkojë hapjen e dosjes së vrasjes së tij.
Fjala e Azem Hajdarit: Pushteti i Sali Berishës është një diktaturë e re, unë
di shumë gjëra dhe ai që di, zhduket
"....Në rast se kjo diktaturë e re, e cila ka ndërmarrë një maratonë, vazhdon
në këtë mënyrë, le të jem unë viktima e parë e kësaj diktature. Unë jam shumë
dakord që të mbrohet qytetari i thjeshtë. Problemi është politik dhe thjesht
politik. E dija që një ditë do të dilja përpara Parlamentit ose përpara një
institucioni tjetër dhe do të diskutohesha. Pse? Jam i pari. Isha tre muaj
kryetar i Partisë Demokratike, ish-kryetar i Lëvizjes Studentore dhe nënkryetar
i saj. Domethënë unë di shumë, dhe njeriu që di duhet të zhduket. Nuk dua ta
fsheh, jam i shqetësuar nga zhvillimi i ngjarjeve të fundit në jetën politike,
që çoi deri në kërkimin e heqjes së imunitetit tim, lidhur me një pseudokrim
dhe që nuk dihet se ç'situata të reja do të sjellë në ditët që do të vijnë.
Nëse një deputet bën një kundërvajtje penale dhe atij i hiqet imuniteti për
këtë kundërvajtje, atëherë ne nuk jemi më deputetët e kohës së demokracisë, por
deputetë të kohës së Enverit. Kjo do të thotë se ne jemi marioneta, që na i
ngre dhe na i ul duart një regjisor dhe që bën me ne si t'i dojë qejfi, pa
pyetur as elektoratin dhe as Kushtetutën. E dyta, lidhet me kokën e turkut, që
në këtë rast jam unë. Ju të nderuar deputetë e dini si drita e diellit se kjo
kundërvajtje penale e inskenuar nuk do ta çojë në dënim e Azem Hajdarit.
Imuniteti i Azem Hajdarit hiqet sot dhe kjo do të thotë se asnjë në këtë
Parlament nuk ka më imunitet. Në rast se kjo diktaturë e re, e cila ka
ndërmarrë një maratonë, vazhdon në këtë mënyrë, le të jem unë viktima e parë e
kësaj diktature. Po e mbyll me një shprehje që e ka thënë Bardhyl Londo: "Në
rast se demokracia vjen në këtë mënyrë, mos ardhtë kurrë". Dhe ju demokracinë
po e sillni me shumë dhimbje, por si diktaturë të re".
Marjan Gryka: Sali Berisha i di, por i fsheh vrasësit e Azemit
Deklaroj, se vrasja e Azem Hajdarit është politike, mbasi ka një linjë të tillë
synimi për ta eliminuar, pra që organizatorët e vrasjes së Azem Hajdarit, kanë
qenë dhe janë brenda politikës, sepse vrasja e tij ishte dhe mbetet për motive
politike e jo "kanunore", apo për motive të tjera, siç janë munduar
ta përflasin "zëra" që kanë dorë në këtë vrasje, madje edhe brenda
kupolës drejtuese të PD, sidomos prej Sali Berishës, i cili nuk po flet më për
ata që deklaroj si vrasës, por që tashmë i ka bërë "miq dhe ortak". Nëse Fatos
Nano është organizator i vrasjes së Azemit, këtë e di vetëm Sali Berisha, sepse
ai e ka shpallur të tillë, përpara shqiptarëve dhe gjithë botës. Ndaj duhet t'i qëndrojë kësaj deklarate me pranim, ose
me mohim. Dosja e vrasjes së Azemit duhet të rihapet dhe të rihetohet e plotë.
Kjo duhet bërë, sepse ajo dosje nuk i ka "fletët" e hetimit të bardha. Dhe kjo
hapje, mendoj se duhet të nis me dëshminë dhe denoncimin e kreut të PD Sali
Berisha, akuzuesit dhe të akuzuarit kryesor si organizator i vrasjes së Azemit
me nxjerrje nga mbledhja e natës së 12 shtatorit 1998. Berisha
deklaroi se do të hapte këtë dosje kur të vinte PD-ja në pushtet, duke
deklaruar gjithashtu publikisht se ditën e parë të ardhjes në pushtet, do të
vendoste përpara ligjit vrasësit e vërtetë të Azemit. Këtë gjë ai nuk e ka bërë
as kur ishte në opozitë, as tani që mbushi 8 vjet në pushtet. Prokuroria duhet
të thërras Sali Berishën në seancë dëgjimore si dëshmitar, si denoncues dhe si grumbullues
e njohës provash të shumta, por edhe si të akuzuar për organizimin e vrasjes së
Azem Hajdarit, për të hedhur dritë mbi vrasësit dhe motivet e vrasjes. Por edhe
nëse ai nuk pranon ashtu si deri tani, drejtësia duhet të realizojë marrjen e
tij në pyetje forcërisht, ashtu siç merren në pyetje gjithë shtetasit shqiptarë
që dinë një krim, ose që janë pjesë e mundshme e një krimi.