Prishtinë - Deputetja e Lëvizjes "Vetëvendosje", Alma Lama, në seancën
parlamentare të së enjtes e ka pyetur ministrin e Forcës së Sigurisë së Kosovës
(FSK), Agim Çeku, se pse nuk e thonë të vërtetën në lidhje me zëvendësministrin
e FSK-së, Sllavisha Filipoviq i cili është zënë duke dërguar në Beograd
informacion në lidhje me armatimin e FSK-së.
Çeku, në përgjigjen e tij, e ka konfirmuar se Filipoviq është zënë duke
shkëmbyer e-mail me zyrtarët serbë, në të cilat, sipas tij, ata si ministri nuk
kanë vërejtur se ka pasur rrjedhje të ndonjë informacioni të rëndësishëm.
Lama, në një prononcim për Telegrafin tha se në rast se një zyrtar i lartë apo
çfarëdo shtetasi i Kosovës bën spiunazh, "ai ka kryer vepër penale që
sanksionohet edhe me kodin penal të Republikës së Kosovës - neni 131".
"Të kryhet një vepër e tillë nga zëvendësministri, minimumi që duhet të bëhej
ishte të shkarkohet nga pozita e tij dhe pastaj të akuzohej edhe për spiunazh",
shprehet ajo.
Sipas saj, përpjekja e Ministrisë së FSK-së ka qenë që ky problem të mbetet në
hije dhe të mos bëhet e madhe në publik.
"Krejt kjo për shkak të koalicionit, sepse ai është person politik. Mirëpo, kjo
është shumë e rrezikshme, sepse të dërgosh të dhënat e FSK-së (që pretendon të
jetë Ushtria e Kosovës), në Beograd, do të thotë të rrezikosh seriozisht
sigurinë e Kosovës në të ardhmen. Të dhënat që i ka dërguar zëvendësministri,
kanë qenë në lidhje me llojin e armatimit, por me siguri ka dërguar edhe të
dhëna të tjera. Nuk mund të lejohet që në institucionet e Kosovës të punojnë
njerëz të cilët bëjnë spiunazh për ndonjë shtet tjetër", ka theksuar Lama.
Në anën tjetër, drejtori për informim në Ministrinë e FSK-së, tha për
Telegrafin se qëndron prapa fjalëve të ministrit Çeku të thëna në seancën e së
enjtes në Kuvendin e Kosovës.
Ndërsa, zëvendëskryetari i parë i Komisionit për Mbikëqyrjen e Agjencisë së
Kosovës për Inteligjencë, Fadil Demaku ka deklaruar se nuk ka ndonjë
informacion shtesë për rastin e zëvendësministrit Filipoviq, përveç asaj që
është thënë dje në Kuvendin e Kosovës nga Agim Çeku.