VOAL - Online Zëri i Shqiptarëve | ||||
â€DY HEROINA SHQIPTARE†(NGA ARKIV I DIELLIT) Nga DALIP GRECA E Enjte, 05.09.2013, 07:42am (GMT1)
Gazeta e tetorit '84 hapej me aktin e dy motrave Zamira dhe Isabela Islami, të cilat kishin kapërcyer detin me not dhe kishin kaluar në Korfuz, ku ishin dorëzuar tek autoritetet greke. Motrat kishin shpëtuar vetë nga vuajtjet e ferrit komunist, por vëllai i tyre Klementi kishte humbur jetën. Dielli e përshkruan aventurën e dy motrave nëpër dallgët e detit, aventurë që kishte zgjatur 12 orë. Pena e Xhevat Kallajxhiut e përshkruan aktin e tyre heroik dhe i cilëson ato si "dy heroina." Humbjen e vëllait, Kelmendit, Dielli e përshkruan kështu: Që të tre notuan pranë njëri tjetrit gjer në afërsi të Korfuzit, por atje nga korrentet e detit, e humbën njëri-tjetrin. Zamira dhe Isabela u gjetën dhe u muarën nga një Jaht Italian, i cili i çoi në Korfuz. I vëllai, mjerisht nuk u gjet dhe nuk dihet se si përfundoi fati i tij. Duke u përpjekur të sjellë detaje, Dielli shkruan: Të dy motart dhe i vëllai e kishin bërë me kohë planin për t'u arratisur nga Shqipëria dhe kur u erdhi rasti i volitshëm, kur shkuan në Sarandë për pushime, e vunë në zbatim. Arratisja e guximshme e Zamirës dhe Isabelës u lajmëruan nga Agjencitë dhe gazetat e Greqisë dhe të shumë vendeve të tjera të Botës, njoftonte Dielli. Gazetat botuan me tituj të mëdhenj hollësirat e arratisjes dhe intervistat si dhe fotografitë e këtyre dy heroniave shqiptare. Kur Dielli botonte këtë koment për "Dy heroinat" njoftonte se ato ndodheshin përkohësisht në Athinë dhe pritej që të vinin shpejt në Shtetet e Bashkuara të Amerikës. Po ashtu Dielli paralajmëronte se ato do të vendoseshin për ca kohë në Detroit, ku ndodhej daiu i tyre (në fakt i priti djali i xhaxhait të nënës), zoti Isuf Selenica bashkë me familjen e tij. Në fakt motrat mbërritën në Shtetet e Bashkuara të Amerikës më 19 dhjetor 1984 dhe u vendosën për gjashtë muaj në Detroit për të kaluar më pas në Washington. Dielli shfaqte shpresën se për zonjushat Zamira dhe Isabela do të shkruante sërish dhe shtonte: Për tani kufizohemi vetëm duke i uruar që t'i marrë fati për mbarë!
Motrat Zamira dhe Isabela i përkisnin një familje atdhetare që kishtë dhënë
shumë për Kombin, kishin dhënë kontribut për krijimin e shtetit shqiptar, si
nga nëna ashtu edhe nga baba, por regjimi komunist i masakroi, pushkatoi,
burgosi, internoi. Edhe gjyshja 90 vjeçare ishte internuar, edhe prindërit dy
here. Vetë motrat kishin kaluar 10 vite internimi para arratisjes, ndërsa
vëllai, para arratisjes kishte qenë në burg për "agjitacion e propogandë".
Pikërisht kur ishte arrestuar i vëllai ato ishin internuar në Çermë të Lushnjës. DALIP GRECA
|
||||
Copyright © 2005-2008 Nulled by [x-MoBiLe]. All rights reserved. |