Qeveria e Kosovës ka dënuar fyerjet që i janë bërë deputetes Alma Lama, nga
Forumi Rinor Musliman.
Në një komunikatë për medie, ekzekutivi thotë se liritë dhe të drejtat e
qytetarëve, në veçanti liria e shprehjes janë të garantuara me Kushtetutë, dhe
se çdo cenim i këtyre të drejtave, paraqet "cenim të shtetit të Kosovës dhe
demokracisë tonë qytetare".
Deputetja e Lëvizjes Vetëvendosje Alma Lama, ka komentuar para Kuvendit një
ligjeratë të një hoxhë në Prizren, të cilën e ka vlerësuar si fyese.
Predikimi i hoxhës, ndërkaq ka provokuar një debat dhe polemika të ashpra mes
grupeve të ndryshme fetare dhe intelektuale, në publik dhe portale.
Lëvizja Vetëvendosje ka kërkuar nga Lëvizja Islamike Bashkohu, që të
distancohet nga shkruesi i njoftimit në emër të Forumit Rinor Musliman, meqë i
takon edhe këtij subjekti politik.
Vetëvendosje ka shkruar se kërcënimet drejtuar Alma Lamës "do të hasin në një
kundërpërgjigje qytetare, transparente e të drejtë, dhe nuk do të kenë asnjë
sukses".
Sipas komunikatës së lëvizjes thuhet se Lama është fyer ne bazë të prejardhjes
së saj nga Kruja, ndërsa thuhet se edhe është kërcënuar.