RAMI MEMUSHAJ - AKADEMIA E SHKENCAVE I KA BËRË FRESK PUSHTETIT KËTO 22 VJET
E Shtunë, 07.06.2013, 10:08am (GMT+1)
Akademia e Shkencave e Republikës së Shqipërisë do zgjedhë këto ditë kryetarin
e ri. Gjuhëtari i njohur, Rami Memushaj është shprehur shumë kritik në një
intervistë në të përditshmen Shqip me Akademinë në tërësi. "Funksioni i
[Akademisë] ka qenë t'i bëjë fresk qeverisjes së radhës; as para "˜90-s nuk ka
qenë një institucion me të vërtetë i pavarur, por të paktën nuk ka qenë pa
peshë në jetën kulturore të vendit, sidomos me kërkimet dhe botimet në fushën e
albanologjisë", thotë ai.
Më poshtë, në përgjigje të pyetjes se çfarë është bërë këto 22 vjet prej saj,
Memushaj kalon në detaje: "Shoqëria shqiptare ka pësuar zhvillime të
vrullshme, kriza e luftëra, por zëri i Akademisë, si tempulli i dijes, ka qenë
zero. Gjithnjë në bisht të situatës, pa busull dhe pa orientim drejt interesave
madhorë kombëtarë. Le të kujtojmë heshtjen e saj për çështjen e autoqefalisë së
Kishës Ortodokse Shqiptare; ose "Platformën për zgjidhjen e çështjes kombëtare
shqiptare" (të vitit 1998, kur në skenë kishte dalë UÇK-ja), në të cilën
kërkohej ndërhyrja e faktorit ndërkombëtar "për ta njohur Republikën e Kosovës
si element konstitutiv të Republikës Federale të Jugosllavisë"; ose heshtjen e
saj në vitin 2001, kur shpërtheu konflikti i armatosur në Maqedoni; ose
sjelljen e saj me rastin e atlasit gjeografik të hartuar prej drejtorit të
Qendrës së Studimeve Gjeografike, atlas që pakicat në Shqipëri i rriste
artificialisht në mbi 10%; ose heshtjen e saj për varrezat e ushtarëve grekë,
për manastiret e memorialet greke etj."
www.voal-online.ch
|