Ekspertët e sociologjisë theksojnë se faktor nxitës i kësaj situate është "Enciklopedia Maqedonase" , e cila me botimin e saj helmoi gjeneratat e reja, të cilat tash e tutje mendojnë ndryshe për bashkëmoshatarët maqedonas dhe e kundërta

Zhvillimet e fundit pas publikimit të "Enciklopedisë Maqedonase" kanë nxitur shqetësime duke vënë në rrezik bashkëjetesën dhe marrëdhëniet ndëretnike. Implikimi dhe reagimi i fuqishëm i të rinjëve, studentëve, por nga ana tjetër edhe tifozëve të klubeve ka bërë që të rriten tensionet ndëretnike, duke përfshirë ato edhe të rinjtë e të dy komuniteteve, si maqedonasit ashtu edhe shqiptarët. Kjo u pa qartë me protestat e organizuara nga nxënësit e shkollave të mesme dhe nga studentët shqiptarë, por nga ana tjetër edhe pritjet për protesta nga tabori maqedonas, të cilat veçmë janë paralajmëruar.

Ekspertët e sociologjisë theksojnë se faktor nxitës i kësaj situate është "Enciklopedia Maqedonase" , e cila me botimin e saj helmoi gjeneratat e reja, të cilat tash e tutje mendojnë ndryshe për bashkëmoshatarët maqedonas dhe e kundërta. Eksperti i çështjeve të sociologjisë, prof.dr.Metush Sulejmani vlerëson për  agjencinë e lajmeve INA se s'do mend se botimi i enciklopedisë i ka fyer tejmase shqiptarët pavarësisht ku jetojnë ata, mirëpo sipas tij, niveli i fyerjes dhe përbuzjes së tyre më tepër u përjetua në Maqedoni.

"Paraqitja e kësaj enciklopedie për çdo ditë po reflekton energji negative edhe në sferën e marrëdhënieve ndëretnike në Maqedoni. Ky efekt negativ i enciklopedisë ka ndikuar edhe në grupmoshat më të reja siç janë nxënësit dhe studentët që për mendimin tim kanë të drejtë të reagojnë. Mirëpo në këtë rast duhet të reagohet në mënyrë dinjitoze, civilizuese dhe ti jepet hapësirë arsyes e jo paragjykimeve, dhe ky problem të tejkalohet në mënyrë racionale që të arsyetohemi edhe para ndërkombëtarëve se kemi vlera, traditë të tolerancës dhe bashkë me to edhe autoktoni dhe histori të lashtë, të begatshme dhe të lavdishme", ka vlerësuar Sulejmani.

Ai ka theksuar se shqiptarët në Maqedoni kanë forca intelektuale dhe politike të cilat duhet të involvohen për zgjidhjen e problemi dhe assesi zgjidhja e problemi të bartet te ata që nuk dinë dhe nuk munden të ballafaqohen me këtë problem. Sipas tij, nga gjithë ky reagim duhet të evitohet manipulimi i ndonjë force destruktive pavarësisht se nga cila anë implikohet.

Profesori i psikologjisë, prof.dr.Lulzim Murtezani ka theksuar se frustrimi i të rinjve shqiptarë i shfaqur ditëve të fundit përmes protestave dhe demonstratave në rrugë vjen si rezultat i botimin të enciklopedisë maqedonase, e cila fyen kombin shqiptar.

"Po padyshim se këto janë shenja dhe simptome të mos durimit, mos tolerancës ndërnacionale, shenja të një mllefi të akumuluar vite me radhë. Në qoftë se nuk trajtohen këto gjera, në qoftë se nuk kemi qasje shkencore, atëherë këto janë shenja serioze dhe me siguri se nuk paralajmërojnë perspektivë të tolerancës ndëretnike për të cilën insiston bashkësia ndërkombëtare dhe disa politikan në Maqedoni", ka theksuar Murtezani. (http://www.ina-online.net)