Kapiteni i kombëtares beson se skuadra mund të arrijë një rezultat pozitiv në Beograd
Agim Cana ka shënuar ndaj Crvena Zvezdës kur luante me Prishtinën dhe fitoi kampionatin
Gazeta Sporti sot shkruan se mbiemri Cana nuk është i panjohur në Serbi. Vite më parë, i ati i
kapitenit të kombëtares shqiptare Lorik Cana, ka shënuar një gol
pikërisht në Beograd. Numri pesë i kuqezinjve ka folur për "Supersport"
kur u nisën drejt Serbisë dhe ka thënë se do të bëjnë maksimumin për të
marrë një rezultat pozitiv. Kapiteni i kombëtares shqiptare ka thënë se
lojtarët do të japim shpirtin në fushë dhe do t'i bëjnë krenarë të
gjithë shqiptarët anë e mbanë botës. Ai ka vlerësuar edhe kundërshtarin
duke thënë se janë vërtet të fortë, por kjo gjë i motivon akoma më
shumë. "Është një ndeshje shumë e rëndësishme për ne dhe premtojnë se do
të bëjmë të gjithë shqiptarët të ndihen krenarë për ne.
Babai im ka luajtur në Beograd ndaj Crvena Zvezdës me Prishtinën e
madhe. Ai shënoi gol, ndërsa ekipi i asaj kohe fitoi ndeshjen në
kampionatin jugosllav. Shpresojmë të përsërisim atë sukses për të
kënaqur një komb të tërë", ka shtuar më tej Loriku. Ai që është simboli i
sakrificës, dëshirës për të fituar dhe i përkushtimit maksimal ka
premtuar se lojtarët e kombëtares janë të motivuar aq shumë sa duan të
bëjnë historinë. "Kjo ndeshje është me shumë vlerë. Jemi në një moment
të mirë dhe duam të shkruajmë historinë.
Sigurisht që nuk do të jetë e lehtë sepse kemi përballë një ekip të
fortë, por ne jemi Shqipëria dhe hyjmë në fushën e lojës për të fituar
në çdo stadium. Do kërkojmë ta godasim kundërshtarin dhe të luajmë në
grup siç bëjmë gjithmonë. Forca e grupit, sakrifica dhe ndihma për
njëri-tjetrin është sekreti ynë. Do t'ia dalim dhe kemi shumë besim", ka
përfunduar Lorik Cana.