VOAL - Online Zëri i Shqiptarëve

MOTIVE VJESHTE Nga PËRPARIM HYSI E Enjte, 10.24.2013, 12:27pm (GMT1) 1. Vjeshtë Sado vjeshtë, është ditë e bukur Qelli i kaltër... pa kufi Nëpër rrugë kalon një flutur Eh, ç'të shohësh? Ç' bukuri! Unë e shoh e mbes habitur Flokët ar si gjethevjeshte Ka një bukuri të "kripur" Thelë mbi bisht, kur jep buzëqeshje. Është e hollë sikur është gjethe ( Sa kam frikë mos e merr era?!!!) Si pranverë kjo ditë vjeshte A mos vallë u kthye pranvera?! Vjeshtë në stinë e vjeshtë nga mosha Porse syri ja: shikooooon!!! Ç'kam me të unë që mos qofsha! Pleqërisë tjetri harbon... 18 tetor 2013 -- 2, Portret Ti më je si lule shege Me një ngjyrë alle të çelur Mollë sapokëputur dege Faqet kuq si shegë e pjekur Dhëmbët bardhë si gurëza lumi Buzët trëndafil në prill Si mua mendja mos më humbi Më pandeh vallë, tyryfil?!!! Trupi i drejtë si një fidan Beli i ngushtë si unazë Mëdysh ndahet imi xhan Që të rri me ty veç cazë. Kaq mjafton se nuk është pak Të sajdisesh nga një nur O Perëndi,pse nuk merr hak? Pse më bëhet mua sikur... 20 tetor 2013 -- 3. Do të doja Do të doja të vije këtë mbrëmje Këtë natë vjeshte si natë behari Të kujtonim atë kohë me ëndje Kur humbnin vjeshtës mbytur nga malli. Të kujtonim ato shtigje të thepisura Kur gjarpëronim brenda në pyll * A të kujtohet ai pyll plot me lisa?! Tani zë e vajtoj se jam vetëm fill. Vajtoj jo se jam vetëm fill Por dhe për pyllin që nuk është më. Do të doja pranë se nuk ndihem mirë Dhe po të ishe ti, trishtimin e përzë. Kjo vjeshtë pa pyll më duket lakuriqe Dhe vetja , pa ty, më ngjan si qyq Mallkoj ato mendje aq arkaike Këtë mbrëmje vjeshte jam Krisht i vënë në kryq. -- * pylli i Vajkanit në Fier që nuk egziston më... 20 tetor 2013 PËRPARIM HYSI

Copyright © 2005-2008 Nulled by [x-MoBiLe]. All rights reserved.