VOAL - Online Zëri i Shqiptarëve | ||||
SE DASHURIA PA MËKAT NUK KUPTOHET Cikël poetik nga QAZIM SHEHU E Shtunë, 12.21.2013, 03:46pm (GMT1) FJALA Fjala si buka bëhet bukë e përditshme, Si shiu kthehet kur gjumin e ndjell Drejt caqesh të paarritshme. Nga gjithë lavditë që shkon të ndezë, Me forcën e vet të fshehtë, Trembet të zbërthejë magjinë që s`rrëfehet, Prej një puthje të nxehtë, Siç trembet reja t`i freskojë zjarrminë diellit Mëshirëmadh, Mos shkrihet krejt... -- KËNGËT Ç'kordë humbi, ç`zanore kur melodia u plas, Dhe u shkri si një valë në ajër, Që një vullkan na e hodh përbri. Si zogu në bar tek lëngon si bari që zjarr provon, Vijnë ato, këngët e gjyshërve të mi, Këngët e nënë sime dhe të ëndrrës së saj për fëmijtë, Këngët e dhelindjes dhe këngët e mërgimit, Këngët e dashurive të lejuara pas përçmimit, Vijnë... Tani gurmazit të lodhur rrinë si nikotinë duhani Rrinë si ujë në tuba pa rrjedhje; ato,këngët. Si një as që s`del nga mëngët... -- DASHURIA Me fjalë mëkatare i afrohem dashurisë, se Dashuria pa mëkat nuk kuptohet, Thonë është një enë qelqi që kris, Kur drejt zjarrit të zemrës afrohet. Thonë godet pa prerë e s`ndal kurrë, Dashuria, kjo ndjenjë mëkatare, Që nuk e ndal në vend të mendojë një burrë, Edhe pse bëhet i esëlll fare. -- HIJE U tradhtova nga një fije bari, kur u ktheva, Aty më nuk ishte. As ajo vërshëllima e një zogu përmbi shelgjishte. U tradhtova nga një fije bari si nga fija e flokut, Që dje qe mbi ballë, e sot ra, Nga nxehtësia e trurit të lodhur, Në mendime ,aspak të mëdha. Edhe sot një fije, një fije tjetër pasnesër, Pas ca kohe, një tufë, Duke u shkundur si një gjëmbaç i egër, Si në shkretëtirë një kaktus... Dhe kush faj s`më ka për këtë, ndonëse Vitet fajësoj për vrap çmendurak, Ajo fije bari nuk del më, Veç krahët e hijes që që na mbulojnë nga pak... QAZIM SHEHU
|
||||
Copyright © 2005-2008 Nulled by [x-MoBiLe]. All rights reserved. |