Shakira
në sytë e Gabriel GarcÃÂa Márquez. Kolumbiani më i famshëm i botës takon
kolumbianen më të famshme të botës
Inteligjente,
e trembur, e ndershme, llupëse, dinake, me botë të gjerë shpirtërore. E pastaj:
gjeniale, e thellë, e ndjeshme, plot me energji. Kështu e përshkruan gjeniu
Gabriel Garsia markezi (Gabriel GarcÃÂa Márquez), përfaqësuesi më i madh i
realizmit magjik amerikanolatin, kolumbiani që fitoi Çmimin Nobel të Letërsisë
më 1982, autori, ndër shumë e shumë të tjera, i romaneve "Kolonelit nuk ka kush
t'i shkruajë", "Njëqind vjet vetmi", "Dashuri në kohët e kolerës", "Kronika e
një vdekjeje të paralajmëruar, këngëtaren magjike kolumbiane Shakira, pas
takimit të parë me të, në prozën e tij "I çmendur pas Shakirës" të cilën ua
sjellim më poshtë lexuesve:
----
Shakira
është nisur nga Maiemi në një avion të drejtuar për në Buenos Aires,
kryeqytetin e Argjentinës, të hënën me një shkurt, e ndjekur nga një gazetar që
kishte për qëllim t'ia bënte këngëtares vetëm një pyetje, qoftë edhe nëpërmjet
telefonit, për një emision radiofonik. Për arsye të ndryshme, ndonëse fare
normale, parë kjo nga ngarkesat e mëdha të punëve të të dyve, gjatë njëzet e
shtatë ditëve të mëvonshme, gazetari kurrsesi nuk ka arritur të komunikojë me
Shakirën, gjersa në muajin mars rrugët e tyre janë pikëtakuar në Spanjë. Në
këtë rrethanë, e vetmja gjë që gazetarit i kishte mbetur të bënte, ishte tema
dhe titulli i emisionit: "Çfarë bën Shakira kur është vetëm?": Dhe Shakira,
duke qeshur me aq lezet dhe duke tundur itineraret e udhëtimet dhe programin e
koncerteve në duar, i është përgjigjur me një fjalë: "Jetoj".
Duke u
rikthyer në mesditën e një shkurtit, pra, Shakira arrin në Buenos Aires dhe
punon papushim deri në mesnatë, duke dalë përtej së hënës, në të martën, pa
gjetur madje as kohë dhe as mundësi që ta festojë ditëlindjen e saj, e cila bie
pikërisht atë ditë, me një shkurt. Më një mars, kur përfundimisht Shakira
arrinte të flejë një natë të tërë në një hotel të Madridit, kryeqytetit të
Spanjës, ajo mund të thoshte tashmë se kishte udhëtuar të paktën sa një
stjuardesë avioni, më shumë se dyzet mijë (40000) kilometra në një muaj.
Ngarkesat e
punëve të Shakirës, kur është në tokë, nuk janë më pak të rënda, nuk janë më
pak raskapitëse. Midis muzikanëve, teknikëve të ndriçimit, makinistëve,
inxhinerëve të zërit, grupit shoqërues, është si një gjenerale midis një
formacioni të vërtetë dhe të mirëfilltë luftimi. Ajo merret me gjithçka vetë,
personalisht. Shakira nuk është kompozitore e shkolluar, por përgjatë provave
ajo përqëndrohet mbi çdo instrument dhe veshi i saj i përkryer, i shoqëruar nga
një ndjesi e ashpër e kritikës, e lejojnë atë që t'i ndërprejë provat kur ka
nevojë për ta gjetur notën ekzakte. Me muzikanët raporti nuk kufizohet aspak në
një bashkëpunim të rëndomtë në skenë. Dhe kjo ndodh sepse, realisht, nga zemra
e Shakirës, nga zemra e saj e pashoqe, varen edhe fatet personale të
bashkëpunëtorëve të saj.
Përkundër të
gjitha këtyre, është shumë e vështirë të pikasësh tek Shakira shenja lodhjeje,
por kjo nuk duhet të të mashtrojë. Gjatë një vargu prej dyzet (40) koncertesh
muzikore që këngëtarja ka dhënë në Argjentinë ajo nuk ka treguar absolutisht as
shenjën më të vogël të lodhjes, edhe pse gjatë datave të fundit të turit, është
dashur që dikush ta priste në mbarim të koncerteve dhe ta merrte në krahë deri
tek makina. Në disa raste ajo ka kaluar në takikardi, pra në aritmi të rrahjeve
të zemrës, ajo ka pasur pezmatim të fytit, mpirje të kollonës vertebrore dhe
alergji të lëkurës.
Shakira është
vajza e vetme e një argjendari të njohur të Barranquilla, qytet i Kolombisë që
laget nga Oqeani Atlantik, përballë ishullnajës së famshme të Karaibeve.
William
Mebarak quhet babai dhe Nydia Ripoll quhet e ëma. Është një familje me
prejardhje arabe, e cila ka qenë gjithmonë nën mbrojtjen e perëndive të arteve
dhe të letërsisë. Pjekuria tejet e parakohëshme dhe e pazakonshme e Shakirës,
gjeniu i saj krijues, vullneti i saj i hekurt, si dhe mikpritja e një qyteti të
veçantë kolumbian siç është Barranquilla, janë të vetmit argumente për të
shpjeguar fatin kaq të veçantë të familjes dhe të bijës së saj, fat kaq i
rrallë dhe kaq i veçantë. Vitet e saj të parë ngjajnë shumë me tepër me dekada.
Kronistët zyrtarë japin të dhëna të sigurta se kur Shakira ishte shtatëmbëdhjetë
muajsh e thoshte përmendsh alfabetin. Ajo që atëherë kishte filluar të
numëronte. Në moshën katër vjeç, pa u marrë askush me të, ajo e kërcente në
mënyrë të mahnitshme kërcimin e barkut, në shkollën e murgeshave të
Barranquilla, të cilën një funksionar i dhënë pas dëfrimeve, e kishte
themeluar, që në vitet tridhjetë, në shenjë nderimi ndaj kulteve vendëse.
Kur ishte
shtatë vjeçe, Shakira kishte kompozuar tashmë këngën e saj të parë. Midis
moshës tetë dhe dhjetë vjeçe kishte shkruar vargjet e para dhe kishte realizuar
këngën e parë me tekst dhe muzikë origjinale. Në të njëjtën periudhë ajo ka
firmosur kontratën e parë, ku parashikohej që ajo t'iu jepte koncerte
punëtorëve të minierave të qymyrgurit të El Cerrjon, në Guajirën e Sipërme. Ende nuk i kishte filluar studimet e larta kur një shtëpi diskografike e
kishte regjistruar albumin e saj të parë.
"Gjithmonë e
kam ndjerë si diçka tejskajshmërisht të natyrshme dhe të domosdoshme krijimin,
recitimin e poezive të dashurisë", më thotë Shakira. "Kur shkruaja hartimet
shkollore gjithmonë kam marrë vlerësime shumë të larta. Nota shumë të mira kam
pasur në të gjitha lëndët, përveç matematikës." Një gjë ajo nuk e pëlqente.
Miqtë dhe prindërit e detyronin të këndonin në bashkimet e ndryshme familjare.
"Parapëlqej të këndoj përpara një pafundësie njerëzish, por nuk mësohem dot të
këndoj përpara vetëm katër pesë vetave që më shikojnë duke m'i ngulur sytë
ndërkohë që unë luaj në kitarë dhe intepretoj."
Me fytyrën e
një vajze të përkryer, të kthjellët, të dlirë e të çiltër dhe me pamjen që të
jep idenë kundërthënëse të një qenieje delikate të brishtë, përkundër faktit që
ajo është një qenie me energji të pashterëshme, ajo gjithmonë ka qenë e sigurtë
se do të bëhet një personazh i famshëm, madje në rrafshin botëror. Nuk e dinte
në cilën fushë do të shkëlqente, por ajo nuk kishte aspak dyshim se do t'ia
arrinte. A thua se gjithçka ishte e shkruar në formën e një profecie. Dhe
Shakira rendte në atë drejtim që e thërriste fati.
Sot ëndërra
e saj është më e realizuar se kurrë. Muzika e Shakirës ka gjurmët personale të
saj, ka tiparet e karakterit dhe të shpirtit të saj, çka e bën atë muzikë krejt
të ndryshme nga të gjitha të tjerat. Askush në botë nuk është në gjendje të
këndojë dhe të kërcejë me sensualitetin e saj, që duket sikur është shpikur nga
ajo dhe që nuk mund ta përsërisë askush tjetër në botë, sepse është dhunti që i
është dhënë një herë të vetme në jetë dikujt dhe ky dikush është vetëm Shakira.
E vetmja që bën të ndjehet rehat në raport me vetveten është zotësia e saj për
ta ndjerë vetminë në kushtet kur ajo ndodhet në mes të pafundësisë njerëzore.
Sapo hypën
në skenë, çdo lloj frike zhduket. Edhe pse terrori i vërtetë është kur nuk
ndjehesh ajo që je. "Ndjehem si një luaneshë në mes të pyllit." Skena është ajo
hapësirë e vetme që ia ka dhënë Shakirës mundësinë e pakufi për ta treguar
vetveten e vërtetë, për të treguar se kush është ajo realisht, se kush do të
jetë ajo sa të jetë gjallë. Shakira është një shembull klasik i një force të
natyrës në shërbim të një magjie tejet të hollë, tejet të përkryer. Pjesa më e
madhe e këngëtarëve parapëlqen ta ketë dritën e skenës mbi fytyrat e tyre, në
mënyrë që ta shmangin ballafaqimin e drejtpërdrejtë me turmat. Shakira,
ndërkaq, parapëlqen saktësisht krejt të kundërtën. Ajo iu ka kërkuar teknikëve
të saj të mos ia lëshojnë dritat mbi fytyrë, madje ato t'i lëshojnë mbi
publikun, në mënyrë që ajo të ketë mundësi që t'i shikojë adhuruesit e saj,
publikun e saj, që ta jetojë shpirtërisht gjithë koncertin, që të komunikojë
shpirtërisht në të njëjat valë me publikun e vet, me çdo anëtar të tij.
"Komunikim
total", kështu e përcakton Shakira këtë mënyrë komunikimi. Turma është e zonja
t'ia transmetojë, t'ia përcjellë asaj një lloj bashkëpërfshirjeje të saj të
cilën e ndjen në lëvizjet saktësisht të njëkohëshme të secilit të pranishëm,
duke e frymëzuar këngëtaren dhe kjo duke e mbajtur peshë, si përpara duarve të
saj, publikun. "Më pëlqen t'i shikoj në sy njerëzit kur këndoj për ta". Disa
fytyra, të papara kurrnjëherë më parë, shkëputen nga masa e madhe njerëzore, të
mbeten në mendje, a thua se i ke tashmë miqtë e tu të vjetër. Kur jemi këtu, te
miqtë e vjetër të saj, duhet thënë pikërisht se, njëherë të pranuar në shpirtin
e gjerë të Shakirës, ajo jeton përherë me ta. Dhe ajo ua përkushton
shpirtërisht një koncert të tërë, apo koncerte të tëra. "Kam kënduar gjithë
natën për filanin," thotë ajo, duke përmendur emrin e një miku të saj. Bëhet
fjalë për mrekulli të fshehta që mund ta përfaqësojnë lavdinë, por edhe
greminën e artistëve të mëdhenj.
Por ka diçka
që të mrekullon në mënyrë tërësisht të veçantë në jetën e Shakirës. Ajo është
shumëfishuar tek fëmijët. Shkollat janë shndërruar në klonacione masive të
Shakirave, të cilat vishen, flasin dhe këndojnë si ajo. Kjo dukuri bëhet edhe
më intriguese kur e vëren se prirja i ka prekur më shumë vajzat që janë aty nga
mosha gjashtë vjeçe. Kopjet pirate të CD-ve të Shakirës janë shndërruar në
monedhën aktuale të tregjeve të industrisë së riprodhimeve që shiten me çmime
speciale tek dyert e shkollave. Zbukurimet që ajo përdor për flokët, rrethet e
qafës, vëthët e veshëve përpihen sapo dalin në tregje.
Në tregje
shiten me shumicë bojërat për të ndryshuar ngjyrën e gërshetave, sipas modës së
kohës, të cilën e përcaktojnë ngjyrat që parapëlqen momentalisht Shakira.
Heroine e shkollës është ajo që arrin e para në klasë me albumin e sapoblerë të
Shakirës. Grupe të tëra bashkohen në shtëpi private dhe, ditë pas dite, mësojnë
kërcimet e reja me të cilat Shakira shfaqet në skenat e tureve të reja të
koncerteve. Ditëlindjet janë festat e Shakirës. Atje këndohet dhe kërcehet,
fund e krye, repertori i Shakirës.
Është
vështirë sot të jesh ajo që është Shakira, por jo vetëm për gjeninë e saj apo
vlerat e saj, por edhe për mrekullinë që përfaqëson për një pjekuri të
pakonceptueshme për moshën e saj. Natyrisht, nuk është e lehtë të përftosh një
alkimi të tillë krijuese, që shfaqet dje në gërshtetat e saj të zeza, tek të
trëndafiltat e sotme, apo tek jeshilet e nesërme. Ka marrë kaq e kaq çmime, trofe,
mirënjohje që pak midis kolegeve më të mëdha në moshë, mund të krahasohen me
të. Kuptohet menjëherë se Shakira është sikurse ka ditur ajo vetë gjithmonë të
jetë: gjithmonë inteligjente, gjithmonë e trembur, gjithmonë e ndershme,
gjithmonë llupëse, gjithmonë energjike, gjithmonë evazive. Barranquilase gjer
në kockë, kudo që ajo ndodhet, prej reve dhe mjegullave të Olimpit të saj, ajo
ëndërron "huevas de lisa" për të ngrënë në atë shtëpi me oxhakë të lartë,
pikërisht përballë detit, të cilën ende nuk ka mundur të blejë, me një pejzazh
me kuaj përpara dhe me shumë qetësi. Ajo i adhuron librat, i blen, i përkëdhel,
por nuk e ka kohën e bollshme për të lexuar aq sa do të donte ajo. Ajo ndjehet
mirë të ketë me vete miq, të cilëve t'ua japë lamtumirën e nxituar në
aeroportet, edhe sepse e di mirë se nuk e ka të lehtë të kthehet për t'i parë.
Sa iu përket
parave të fituara deri tani ajo thotë: "Kam më pak se thonë të tjerët dhe më
shumë se them unë." Vendi ku asaj i pëlqen të dëgjojë muzikë është në një automobil
të mbyllur. Atje dëgjon muzikë me zërin e ngritur në maksimum. Ajo pa
shqetësuar askënd zhytet në tingujt e muzikës. "Është vendi ideal për të folur
me Zotin, për të folur me veten time dhe për të kërkuar të kuptoj." Ajo hap
zemrën dhe thotë se e urren televizonin dhe se kundërthënia e saj më e madhe
është se beson në jetën e përjetëshme. Duke provuar, në të njëjtën kohë,
terrorin nga vdekja, sepse vdekje do të thotë humbje e shqisave."
Ka pasur
raste kur ajo ka arritur të japë mbi dyzet (40) intervista në një ditë, pa
përsëritur asgjë nga njëra intervistë në tjetrën. Ajo i ka pikëpamjet e veta
për artin, për jetën tokësore dhe për jetën e përjetëshme, për ekzistencën e
Zotit, për dashurinë dhe për vdekjen. Duhet thënë këtu edhe se intervistuesit e
saj, duke e ditur këtë gjë, e prekin pikërisht këtë temë në pyetjet që bëjnë.
Ndërkohë që Shakira është specializuar në përgjigje të tipit të papërcaktuar,
avazive, më të nevojshme për t'iu ikur përgjigjeve thelbësore se për të shfaqur
pikëpamjet personale. Ajo hedh poshtë çdo ide sipas së cilës fama e saj është
kalimtare dhe e përkohëshme dhe këmbënguljes se ajo, një kohë të caktuar, do të
humbë zërin nga përdorimi i tepruar i tij. "Në mesin e ditës me diell të plotë,
thotë ajo,"nuk dua të mendoj për perëndimin."
Gjithsesi
specialistët e shikojnë një rrezik të tillë të pamundur, sepse zëri i saj ka
një strukturë që është në gjendje të kapërcejë tepërimet. Shakira ka kënduar
kur ka qenë me temperaturë. Ka kënduar duke qenë e tejlodhur. Por në asnjërin
prej këtyre rasteve nuk ka shfaqur as shenjën më të vogël të dëmtimit të zërit.
"Shqetësimi më i madh për çdo këngëtar," përsërit ajo me këmbëngulje dhe me
zemërim në përfundim të një interviste, "është të ketë zgjedhur në jetë të bëjë
muzikë dhe të mos ketë mundësi ta bëjë një gjë të tillë përditë. Dhe për këtë
mund ta kenë fajin edhe intervistat."
Tema më e
trajtuar në këngët e saj është dashuria. E lavdëron, e idealizon dashurinë dhe,
në fakt, dashuria është shpirti dhe arsyeja e këngëve të saj. Por kur flet për
dashurinë në rrafshin personal, e trajton me ironi. "E vërteta," thotë duke
qeshur ëmbël,"është se kam më shumë frikë nga martesa se nga vdekja.". E pranon
se ka pasur katër të fejuar të deklaruar dhe disa ë tjerë më pak të deklaruar.
Rëndësi kanë pasur për të të dashurit që kanë pasur të njëjtën moshë me të, ata
kanë ndikuar në pjekurinë e saj të veçantë. Përballë këngëtarit portorikan
Oswaldo Rios, më i famshmi i të gjithëve, duket se ajo ka qenë më pak e pjekur.
Shakira flet për të fejuarit dhe për të dashurit me dashuri, por pa vuajtje.
Duket më shumë sikur flet për disa fantazma që, njëri pas tjetrit, kanë mbetur
të palosur në raftet e dollapëve të saj. Nuk ka asgjë për t'u dëshpëruar, në
shenjën e Akuariumit, në fillimshkurtin e ardhshëm, ajo mbush njëzet e shtatë
vitet e saj të para. /Shqipëroi: Elida BUÇPAPAJ
Shqipëroi: Elida BUÇPAPAJ