QENTË E RRUGËS Poemth nga FASLLI HALITI
E Enjte, 04.17.2014, 08:57pm (GMT+1)
Qentë e rrugës I ushqen Rruga. Kazanët e plehrave Janë supermerkatat e tyre, Rrugët si kuzhiniere të mira s'i lenë pa kocka, Plehrat s'i lënë pa rropulli qengjash gjithë blegërima, Gjithë rropulli e koka pulash të therura që kakarisin Si me ulurima.
Nata s'i lë ata pa hotel, jo me pesë, Por me hotele luksozë me një mijëra yje, Si dyshekë «Dormeo», u shtron muzgu, klintëve qen, Abazhuri i hënës dhe llambushkat e yjeve nuk i lenë ata pa dritë Mbrëmja i mbulon ata me çarçafë të endur me rreze hënore Nata nuk ua shuan e yjet, Por i lë çelura llambat e yjeve, si luleborë.
Qentë e rrugës E sigurojnë Bukën. Me forcat e veta, Edhe pse s'mbjellin, Edhe pse s'e korrin, s'e bluajnë vetë bereqetin, Edhe pse nuk e gatuajn vetë asnjë ditë, Edhe pse asnjë ditë s'e pjekin.
Qentë e rrugës Nuk kanë brigadierë Nuk kanë shefa, drejtorë, S'kanë axhendë, ditar, orar, nxitim për në punë. Sepse punë ata kanë vetëm të ngrënët.
S'ka mëngjes, Drekë. S'ka darkë për ta. Ata hanë ku gjejnë për të ngrënë, Bëjnë dashuri në mes të rrugës lirisht, Dhe bëjnë orgjira fare pa droje, Pa turp, pa frikë, Njerëzit qeshin me dashurinë e qenëve, Por ata dëfrejnë natë edhe ditë qytetarisht.
Qentë e rrugës Nuk kanë kartë identiteti, As pasaportë biometrike nuk kanë, Ata lëvizin rrugëve të botës pa vizë Shengen, Këlyshët as nuk ia dinë emrin as nuk e njohin babanë. Qentë e rrugës nuk i njohin ligjet As gjykohen me ligj. Ata i vret kushdo Me gurë Kushdo i mbyt. I vret Bashkia me çifte, pa gjyq.
Varri i tyre Është rruga, Puseta, gjirizi, gropa, hendeku, kanali Arkivolet e tyre janë kazanët e plehrave, Mbuluar me tapete mëngjesesh ngjyrë portokalli.
Qentë e rrugës janë egërsisht të egër Ushtrojnë ende diktaturën Ende ushtrojnë Luftën e Klasave ndaj koneve Qenushve të snobëve, zotërinjve Që ushqehen me konserva sardelesh Që shetisin me «Jaguar» luksoz shesheve tona, Siç shëtisnin bejlurçina dikur me kuaj të bardhë shale. Me «Limuzina», pajtona... Por edhe pse të egër Qentë e rrugës tmerrohen, Terrorizohen ata Mizorisht. I terrorizon uria e zezë Çdo orë, çdo javë, çdo muaj, çdo ditë...
Gusht, 2011
FASLLI HALITI
|