VOAL - Online Zëri i Shqiptarëve

ELEGJI PËR LAJMET NGA SHQIPËRIA 1997 Poezi nga VEHBI SKËNDERI E Premte, 04.18.2014, 10:58am (GMT1) Tani nuk hamë bukë. Nuk bluajmë nëpër dhëmbë fara kungulli, kikirikë e bajame. Përtypim vetëm lajme. Ditë e natë. Çdo sekondë! Pa ngurime. E mjera Shqipëri! Kush nuk ta nguli thikën Ty pas shpine? Derdh lotë shiu, kjo ditë shkurti nëpër xhame. Shkul flokët si Nioba. Lajme! Lajme! Vocrrake grirë e ngrirë, midis shkollës. Vërejnë nga unë me sy të fikur. Lajme nga Troja, direkt. Dhe të shpikur. Tundin thikat e kartelat e deputetëve të Bandave të Gomoneve. Lajme nga fundi i Otrantos. Lajme dylberësh e sekserësh politikë. Rrahin daullet e legenet. Dhe ulurijnë egërsisht, si ujqet. Dhe tundin bishtin, qenërisht, si qentë. Lajme! Lajme! Që thithin gjak, si vampirë nga tragjedia e çmenduria e Kombit. Lajme që, kur i kapërdin, ngelin si tumore kanceroze, shuk në grykë.  Si gozhdë të shpojnë sytë! Shpërndajnë tym të zi (si një mallkim Hyjnor ) sa errësohen bjeshkët. Rrahin si djaj kambanat, shpërndajnë tym. Erë temjan. Dhe erë dheu të freskët. (Prej varreve të posaçelur.) Lajme! Sa kanë dalë nga Psihiatria. Krejt të çmendur! Fshehin kokën nëpër thasët e zinj. Kuislingë e xhahilë të pagdhendur. Kërcejnë nëpër rrugë, si kangurë e lugatë. Përbaltur gjer në fyt, ugareve. Diku fshihen si gjarpëri, nëpër gurë. Diku vrasin, në pusi, heronjtë. Që të rrëmbejnë emrat e të vrarëve. Ka marrë dheu zjarr! Po digjen zjarr dhe gurët. Nuk i ka ngelur Pyllit asnjë ashkël. Me flakët e qyteteve shqiptare përflakur nga kryqëzinjtë, bizantët e nga hunët 24 orë rresht në ditë Evropa jep spektakël! Lajme që iu vjen zor të shfaqen. Fshihen kur iu thërret. Rrinë strukur nën ndenjëse. Shpinëkërrusur! Mbajnë mbi shpinë shpella e rrënoja. Dhe emrat e dashur të mijërave të zhdukur. Lajme që ta shtrëngojnë fytin, si morsa. Ca të të zënë fytin e të mbytin. Ngjizur nëpër mitra monstruoze që pjellin pandërprerje zinxhir: sfinksa, Kuislingë e monstra. Bernë, 10 shkurt 1997 -- Nga libri "Zvicra Shqipëria ime", Prishtinë 2004 VEHBI SKËNDERI

Copyright © 2005-2008 Nulled by [x-MoBiLe]. All rights reserved.