SHIU MJEROHET PËR NJERËZIT Katër poezi të reja nga QAZIM SHEHU
E Mërkurë, 04.23.2014, 09:09am (GMT+1)
AVIONËT
Kush i pari e shpiku shokun Zogu avionin apo avioni zogun. Të dy njësoj i çajnë retë, Të dy njësoj ndërrojnë foletë, Ngjiten në qiell ,ulen në tokë, Bëjnë pikiatë nga qiell i hirtë, Ajrin çajnë me krahë plot dritë. Erdh një kohë u rralluan zogjtë, Avionët u shtuan e shoqishojnë, e ndjekin qiejve gjithë gjëmim, zogjtë mbetën relike, ç`trishtim, dhe kur shfaqen rrallë, sa rrallë, më tepër se njëqind avionë sjellin mall....
AKUARIUM
Atë e shoh në akuariumin e hijes së ngrohtë të tjetrit, Rritet përmes madhështisë së tij, Me siguri në akuarium do jetë vënë kur ka lindur, Do ketë pasur ftohtë ky njeri. Kur tjetri mos ketë më ç`ti japë, Të ketë humbur çelsat e kurdisjes, Do e lajnë si kukull në vaskë, Pa akuarumin çudibërsës...
BRAKTISJA
Era kuis sikur me shqelm t`i kenë rënë në bark. Mbërthen kulmin e çatisë, Pastaj vërshon nga lart, Dhe më hyn në shpirt, Teksa mendoj për shtëpinë time në fshat. Më ngjan se nga kulmi u shkëputën duart e gjyshërve, U përhapën gjethe në hapësirë, Pasi s`gjetën përreth një fytyrë, Për t`i thënë lamtumirë. Era kuis, ndërsa ne aty s`na gjen, Inatin me gjyshërit e shfren...
SHI
Shiu mjerohet për njerëzit, Për njerëzit ëmbëlsohet, Kur bie me të egër, Butë kur shtrohet. Natyra qan me lotët e tij, Qajnë hapësirat që na shohin, Bubullimat e dështuara në madhështi, Dhe madhështitë që na lodhin. Duke na i prurë ky shi Me ëndrra të ngrohta Që na sjellin ftohtësi...
QAZIM SHEHU
|