JANË CA QË GABOHEN Poezi nga ELIDA BUÇPAPAJ
E Shtunë, 07.19.2014, 09:26am (GMT+1)
janë ca që kujtojnë se e nesërmja e metamorfizon të shkuarën në pirgje hiri
lotët dhe dhimbja nuk bëhen kurrë hi ato metamorfizohen në frymë
ndërsa e nesërmja ajo veç i hedh qymyr kaldajës së lokomotivës të trenit të kujtesës
që ndal në stacionet e zbrazta të harresës ku nuk zbret asnjë udhëtar vetëm për të marrë me mend se sa mungon zëri gumëzhues i njerëzve
prej mallit për t'u takuar e prej të pathënave që ngjajnë të ikura prej nesh një herë e gjithmonë
por që ne i mbajmë gjithnjë me vete të shkruara mbi lëkurë tatuazhe grafitësh të pashlyeshme
që padurimisht presin rradhën t'u japim gjak, eshtra e shpirt e t'i kthejmë në jetën e përherëshme të fjalës...
ELIDA BUÇPAPAJ
|