VOAL - Online Zëri i Shqiptarëve

HËNË E RE, HËNË E VJETËR… Cikël me poezi të reja nga QAZIM SHEHU E Premte, 08.01.2014, 08:57am (GMT1) HËNË E RE, HËNË E VJETËR... Hënë e re, hënë e vjetër. Me hënë të re, Nëna jepte dhurata. Kur dilte hënë e vjetër, Na ndalonte. Një pakt me hënën Nëna kishte bërë. Përveç dashurisë së saj, Me çdo ndriçim tjetër Të na ndriçonte... HIJESHI E JETËS Hijeshi e jetës ngrihet Mbi varfërinë. Si kjo pemë që nuk e prekin, Mbi greminë. Të ngjitesh gjer atje Gremina të frikëson. Varfëria i mpreh dhëmbët Hijeshinë tërbon... E PARROKSHME Për ty nuk shkrova poezi, Sa herë merrja lapsin, Ndjenja mbyste fjalët Si një tallaz Dallgët. Për ty kurrë nuk shkrova Në pamundësi. Se ti vetë ishe Poezi... MJEGULLA Mbete në atë anë,larg, Mbush veten pa mua, Zbraz veten për ty, E mbush me mjegull, Se të dua... FIJE E JETËS Dridhej vaj i kandilit, Në fije të jetës. Kur mbaronte Fija bëhej tra. Fillonim me qa. Kërkonim vaj prej gurit, Trarin ta hollonim. Në heshtje të flakës Ëndrrat kërcënonin... KULLA Kur e preku kohën e vet Kulla më tha se ishte krenare. Plumbi shenjtëronte gjakmarrjet. Tani në kohë moderne, Hesht e lodhur, Oxhakrënë. Frëngjitë përpëlit, Sy luani të plagosur Me lak ndër dhëmbë... KULT Për gjithë këngëtaret, Format nudo, Pa zërin e tyre, Një kult kam ngritur. Një kult për levendët, Ministrin, Biznesmenët, Që plumbin s`e llogarisin. Një kult dua të ngre Për njeriun e thjeshtë Që vajton Legjendën e misrit. Dhe aq më tepër Mbi supe Mban të gjitha kultet, Si një dru i plakur Kërpudhat... TRISHTIM I VOGËL Trishtim i vogël i zonjës së vogël, Ia kalon portreteve të Rafaelit, Trishtimit të bukurisë më të madhe i ngjet. Me një ndryshim: Aty nuk ulet asnjë shenjt. Shenjt kjo zonjë e vogël Është vetë... SHPËTIMI Bukuroshe ndjenjash të arratisura Që i kap përmbys mbi jastëk. Atë çast i ngjas një të vrari Hedhur në rrugë. Mëshirë e errësirës Më zhyt në gjumë... QAZIM SHEHU

Copyright © 2005-2008 Nulled by [x-MoBiLe]. All rights reserved.