VOAL - Online Zëri i Shqiptarëve

BANKETI (nga cikli i tregimeve eksperimentale) Nga LUMO KOLLESHI E Mërkurë, 12.24.2014, 07:26pm (GMT1) Një ditë prej ditësh , ndoshta edhe natë mund të ketë qenë , natyrisht këtë mos e merrni fare në konsideratë , nuk di as vet si më shkrepi në plloçin tim një ide e mrekullueshme , së paku kështu m'u duk mua , si bos i parë i vendit , ja që edhe paraja e tepërt e paska për qejf një reklamë , vendosa të shtroja një banket të veçantë , një ide të tillë s'e ka prodhuar dot as truri i Xhorxh Sorosit , nejse , të mos e lë kureshtjen tuaj të davaritet si coprat e ngrëna të mjegullës nëpër kodra , në atë banket do të merrnin pjesë njerëzit më të zgjedhur të vendit , ata që në botën e qytetëruar i nderojnë si ujin e paktë , vetëm shkencëtarët ose , siç e thonë letrarisht , truri i kombit , kështu e lëshova raketën e mendimit tim në qiellin e paanë , shpejt e shpejt bëra një llogari me mendjen time të varfër dhe , sipas lapsit të mprehur mirë , pretendoja të kisha si të ftuar gati-gati jo më shumë se një dasmë mbretërore , me këtë pikë mendje , u lidha me lokalin më me famë të kryeqytetit , që klientët e tij të përhershëm i kishin ngjitur nofkën "OAZ" , thirra medjan elektronike e shkrimore të të gjitha ngjyrave dhe sekteve , pastaj derdha ca para të majme për bustin tim prej dylli që do ta vendosja në tavolinën kryesore , ndërkaq veten time time të gjallë e lashë portier në hyrjen ku do të fillonin të shkelnin shkencëtarët tanë të famshëm , sigurisht që prisja me padurim cili do të ishte i pari që do të bënte këmbë , këtë ndikim e kam sigurisht nga gruaja që nuk jep e merr në fillim viti e muaji apo prêt që për mbarësi të bëjë këmbë ndonjë fëmijë , në këtë çast një hutim I përkohshëm m'i lëbyri sytë , që larg vinin dallgë-dallgë sirenat e makinave luksoze të futura kohët e fundit tek ne ,vetëtimthi zbritën prej tyre bodiguardët apo truprojat siç na pëlqen ta themi ne konservatorët këtë fjalë e shumë të tjera , të cilët , me aq delikatesë e madhështi së bashku ,hapën dyert dhe sytë njëkohësisht , u rreshtua kështu pa përjashtim i gjithë kabineti qeveritar i vendit deri dhe te pastrueset e sekretaret e papijonisura , sigurisht dhe zyrat mund t'i kishin marrë me vete , po të ishin të lëvizshme e të çmontueshme , në këtë pikë ata të gjithë hanin inat me kërmijtë me samar , ndërkohë atij rreshtimi të përkorë i mungonte vetëm kryetari i shtetit që ndodhej përkohësisht me shërbim në Bahreni për një vizitë sulltanore e kortezie , megjithatë edhe presidenca u përfaqësua denjësisht aty me gjithë aparatin e vet , zbarkoi pas pak shpura e mbetur e parlamentit me çdo grup parlamentar , sekretaret vraponin me një frymë mbrapa kryesisë femëroromashkullore , pas tyre , herë në grup e herë vetmërisht , vinin kryesitë dhe këshillat drejtuese të të gjitha partive nga një ekstrem te tjetri , t'i lëmë dhe të tjerët që vinin një e nga një , por çuditërisht e gati makthërisht po kristalizohej një shqetësim tepër i denjë : me gjithë këtë prurje , lokali do të dukej sa një guaskë midhje , kënaqësia që mendoja të përçoja tek shkencëtarët e vendit , do të ishte krejt e papërfillshme , por le të vazhdojmë e të shikojmë bujtësit tanë të nderuar , sigurisht që syrit tim të regjur nuk do t'i shpëtonte asgjë , aty vura re diçka të pazakontë që la një përshtypje të thellë , shkencëtari i vërtetë i energjitikës me famë në kontinent , nuk kishte ardhur , po kështu edhe dy gjuhëtarët e shquar , tre matematicienët e thekur, katër historianët objektivë , vetë pjesa punëtore e Akademisë , mjekët e zotë që venë e bëjnë shpesh vizita jashtë, ndoshta e kanë parë të udhës të marrin pjesë në një seancë tjetër , sikur unë do të bëj vazhdimisht këtë punë , më falni për shkëputjen e momentit , pikërisht në këtë kohë pjesëmarrja e kokave të diasporës që nderonte me përulësi e përmallim , kërkonte një përkushtim e të vërtetë e një përkujdesje të veçantë , këtu e gjeta me vend të mbyllja portat dh t'i jepja shkëndijën e parë takimit që shumë-shumë kishte marrë trajtën e një pajtimi kombëtar të mbetur në tentativë para do kohësh , çështja që më kishte shpëtuar nga duart , ishte përbërja e presidiumit dhe ju e keni të qartë sa e sikletshme është kjo gjë , sigurisht që kryetari i matufjepsur i Akademisë duhej të ndodhej në krahun tim , në krahun e djathtë të bustit tim prej dylli , më saktë , por edhe ai nuk pati prferuar të lyente këmbët aty , më në fund i dhashë një zgjidhje të kënaqshme , sa të kishte qejfmbetje dhe konferenca shtypi nga të gjitha palët për anim nga një krah në tjetrin , e lashë bustin tim përfaqësues të vetëm dhe , nëpërmjet një pulti të fshehtë , vura në lëvizje ligjëratën e zjarrtë për takimin në fjalë , ligjëratë e përgatitur me kujdes nga një komitet i orientimit të çështjeve delicate , i erdhi radha foltores së ngritur me këtë rast në vendin më të dukshëm dhe filluan kështu ligjëratat panegjerike , kushtin paraprak e njihnin të gjithë pjesëmarrësit , çdo folës do të prezantohej me emër , me punimin më të vyer shkencor , titullin apo titujt që mbante në lëmin e shkencës, duke patur si të vetmin qëllim bashkënjohjen e potencialeve shkencore të vendit , por të mos e humbasim floririn e kohës , në pamundësi të regjistrimit të gjithë diskutantëve , se dhe sekretaret e sekretarët aty ishin të gjithë me tituj e grada shkencore , pra ishin në të njëjtat kondita me folësit , për ju zgjodha vetëm një tufë nga më të mëdhenjtë e vendit , në këtë mënyrë ju mund të vazhdoni deri në pafundësi dhe me forcat tuaja të gjithë listën , i pari e merr fjalën doktori i shkencave ekonomike me studimin e vyer dhe të rëndësishëm "Ekonomia e tregut dhe mabrështrimi i kërpudhave në bunkerët e mbetur" , fill pas tij e me një frymë e rrëmben mikrofonin doktori i shkencave mjekësore me studimin e përkthyer në një anglishte të çalë "Llojet e larjeve të duarve pa sapun " , mos humbisni rastin pa e shfletuar , pasi ka dhe një autograf të veçantë nga bija e Neronit ,doktori i shkencave bujqësore doli me studimin "Patatja bukë dhe gjellë dhe patatina" , doktori i sizmologjisë me studimin "Furkat e dëllinjës në parandalimin e tërmeteve" , gjenerali ushtarak që i kishte rreshtuar në pllajën e gjoksit të vet dekoratat e të gjitha kohërave i la gojëhapur të gjith me temën tepër secrete "Gurhedhësit tanë në luftën kundër terrorizmit" , një tjetër nga fusha e agronomisë "Prashitja është dhe vaditje" , pastaj doktori i shkencave zodiokale me studimin "Yllësitë që sjellin fat në piramidën e Keopsit" , këtu vendosa t'i bie shkurt dhe ta ndërpres këtë lloj prezantimi që nuk ka ndërmend të mbarojë , sa në trurin tim kërkon azil një mendim i çuditshëm : me kaq shkencëtarë për metra katrore , numër ky që i ka kaluar të rënët e të gjitha luftrave të marra së bashku , vendi im do të ishte një motër binjake e Zvicrës , por si në Afrikë që është , vetëm dhëmbët i zbardhin si për ironi të fytyrës së vet kaq të zezë. LUMO KOLLESHI

Copyright © 2005-2008 Nulled by [x-MoBiLe]. All rights reserved.