FEMRA Cikël poetik nga QAZIM SHEHU
E Enjte, 02.12.2015, 06:15pm (GMT+1)
FEMRA
Prej teje mori fytyrën një Helenë Ti prej Helenës fytyrën more, Pastaj erdh skulptori me daltë të argjendë Dhe të gdhendi me frymë amori.
Kështu në letër ti ke mbetur, Në parqe ,albume shkëlqimtare, Në to trupi jot i etur, Huton mendje burrash fare.
Dhe ngaqë dot prej teje s`morën Gjithë nektarin që ti shkundje Thirrën poetin dhe skulptorin, Letra dhe bronxi ta ruante....
FLORI I ZEMRËS SË POETËVE
Flori i zemrës së poetëve Në një ishull të largët rri thesar, E zbulon vetëm hëna netëve Çdo e bukur që ngjan rrallë.
Flori i zemrës së poetëve Sa shpesh kthehet metal pa vlerë, Në këtë botë që kafshon egër, Vetveten duke u shpërbërë...
GOZHDË TRISHTUESE E TAKAVE
Kjo gozhdë trishtuese e takave Ngulet në heshtjen që pëlcet, Prej nguljes në heshtjen e ngathët, Nga zemra jote ku zbret.
Si të ishte heshtja një amebë Një pelte lotësh pa mëngim, I ngul gozhdët si hej të nxehtë, Ti mbërthesh ato gjithë tërbim...
DIKU GJËMOI DASHURIA
Si bubullima që shkon dhe derdhet Në hapësira të panjohura Tek unë u nis dhe shkoi të prehet, Tjetërkund me reflekset e lodhura, Dashuria.
Edhe pse një degë qershie që më rri përbri, Ky diell që çakërrit sytë e qesh me mall, Më thërret ta ngjyej brengën për këtë dashuri, Unë mallkoj zjarrin tim që i dhashë aq ballë...
PENTAGRAM
Vijat e horizontit shumuar në pesë, Në pesë vija të ndara, Kërkojnë padashur një çelës, Ca nota malli për të qara.
Kush i vendosi aq përpiktë Aq bukur dhe qetësisht, Mos lojë e fatit që një ditë Muzikën ta shkruajmë në qiell gabimisht...
FYTYRAT E PRINDËRVE
U gëzuan mbi të qarën time fytyrat e prindërve, Këtë s`e di, e parafytyroj, Më vonë më thanë se qava shumë Mos vallë për fytyrat e tyre që tani s`i shikoj?
QAZIM SHEHU
|