| VOAL - Online Zëri i Shqiptarëve | ||||
|
NGA ELIDA BUÇPAPAJ POEMË PËR URËN E TABAKËV E Hënë, 10.11.2010, 08:06am (GMT1)  Përditë e kalëroj Urën e Tabakëve Si në një rit pagan Fluturoj mbi të, ec, nxitoj, vrapoj, kërcej mbi të, hallakatem, tërbohem, me flatra, me flokët që m'i merr era... Përditë e kalëroj Urën e Tabakëve Nga Berna Nga Baseli, brigjeve të Lumit Rin, brigjeve të Lumit Aare, buzë Ligjenit Léman, nga çdo metropol Evropian, në gjumë, zgjuar, në ëndërr, zgjëndërr, në delirin e mallit në rebelimin tim memec... Përditë e kalëroj Urën e Tabakëve më e famshme se Ura Bruklin dhe se Ura Mirabo 1) Një herë në ditë, dhjetë herë, njëqind herë kur e kam Malin e Dajtit pas shpinës, kur jam me të sy më sy... Përditë e kalëroj Urën e Tabakëve Në mëngjez, në mesditë, në mesnatë, në dimër, në shi, në vapën e gushtit, në mbrëmjet e majit, sa herë që humbas në kaosin e urbanizimit të tranzicionit çakall të çakejve, Ura e Tabakëve Është ciceronja Që më nxjerr Nga ngujimi i ankthit... Përditë e kalëroj Urën e Tabakëve I hyp, i zbres, kur kam mbathur sandale, pandofla, çizme dimri, këpucë elegante, me taka të larta e e të holla Apo kur jam çmbathur Zbathur E gishtrinjtë M'i çukasin gurët E Urës së Tabakëve Kur unë e kalëroj Njëqind herë në ditë Kudo qofsha Qofsha 20 mijë milje larg Qofsha 13 vite larg Unë prapë e prapë Kaloj e çkaloj Mbi Urën e Tabakëve kur iki, kur shkoj, kur nisem, kur nuk kthehem, kur kthehem me mendje Ura e Tabakëve harku magjik i një violine Stradivari Far I përjetshëm I nënvetëdijës time. 1) Ura Mirabo - Le Pont Mirabeau - Poezi e Guillaume Apollinaire Le Pont Mirabeau (Marrë nga libri Rapsodia e Golgotës së Tranzicionit) 
Ura e Tabakëve në Tiranë
8 Mars 2009 ELIDA BUÇPAPAJ
|
||||
| Copyright © 2005-2008 Nulled by [x-MoBiLe]. All rights reserved. | ||||
Bruklin Brixh
Ura Mirabo së cilës i këndon Apolineri