ATSH-AFP/ - Gazetarja iraniano-amerikane Roxana Saberi, e dënuar me tetë vjet burg për spiunazh në Iran, ka hyrë në grevë urie që prej pesë ditësh, deklaroi sot babai i saj për AFP-në.
"Ajo ka filluar një grevë urie dhe sot është në ditën e pestë të saj", deklaroi Reza Saberi.
Roxana Saberi, 31 vjeçe, është dënuar nga një gjykatë revolucionare e Teheranit për "spiunazh" në përfitim të Shteteve të Bashkuara, armiq të betuar të Iranit bashkë me Izraelin.
"Avokati i saj bëri apel sot për këtë dënim", vazhdoi babai i gazetares.
Kjo e fundit është burgosur që prej fundit të janarit në burgun Evine, në veri të kryeqytetit.
Gazetarja ka lindur dhe është rritur në Shtetet e Bashkuara. Ajo është iraniane nga i ati, i cili është bërë qytetar amerikan. Irani nuk e njeh parimin e shtetësisë së dyfishtë.
Ajo ka bashkëpunuar me radion publike amerikane NPR, BBC dhe me kanalin amerikan Fox News.
Ajo ishte vendosur në Iran që prej vitit 2003. Sipas autoriteteve, karta e saj e shtypit i ishte hequr që në vitin 2006.
Disa iraniano-amerikanë janë burgosur në Iran vitet e fundit me akuza për cënim të sigurisë kombëtare. Por, asnjë nuk asnjë nuk është gjykuar dhe të gjithë në fund kanë arritur të largohen nga vendi