EVROPA QENDRORE KËRKON TË IMPORTOJË GAZ AMERIKAN
E Djelë, 03.09.2014, 07:42am (GMT+1)
Katër vende të Evropës qendrore u kanë kërkuar Shteteve të Bashkuara t'i ndihmojnë të importojnë gaz natyror amerikan, në mënyrë që të pakësojnë varësinë nga Rusia.
Ambasadorët e Republikës Ceke, Hungarisë, Polonisë dhe Sllovakisë e bënë kërkesën përmes një letre në adresë të Kryetarit të Dhomës së Përfaqësuesve, John Boehner.
Ambasadorët shkruanin se gazi natyror amerikan do të ishte një import i mirëpritur në Evropën qendrore dhe lindore dhe do t'u shërbente interesave amerikane në rajon.
Mosmarrëveshjet e mëparshme lidhur me pagesat për gazin natyror mes Rusisë dhe Ukrainës patën çuar në ndërprerjen e furnizimeve me gaz. Evropa qendrore furnizohet me gaz përmes të njëjtit tubacion që ushqen edhe Ukrainën.
Rusia paralajmëroi të premten qeverinë e përkohëshme të Ukrainës se mund të ketë ndërprerje të furnizimeve si rezultat i mosshlyerjes së pagesave.
Zoti Boehner tha dje se shpreson që Presidenti Obama do të udhëzojë Sekretarin e Energjetikës të miratojë menjëherë kërkesat për eksporte të gazit amerikan në mënyrë që miqtë e Amerikës në Evropë dhe në botë të ulin varësinë nga Rusia. www.voal-online.ch
|
Comments (0)
Dërgoja shokut
Printo
