VOAL - Online Zëri i Shqiptarëve | ||||
RUSIA DO TË NJOHË ZGJEDHJET SEPARATISTE NË UKRAINË E Martë, 10.28.2014, 12:36pm (GMT1) Ministri i Jashtëm rus, Sergei Lavrov, ka thënë se Moska planifikon të njohë zgjedhjet që do të mbahen në lindje të Ukrainës, më 2 nëntor, me gjithë kundërshtimet e qeverisë në Kiev. "Është e rëndësishme të legjitimohen autoritetet atje", ka thënë Lavrov për gazetën ruse "Izvestia". Liderët e kryengritësve pro-rusë në Donjeck dhe Luhansk kanë thënë se do të mbajnë zgjedhjet për të zgjedhur parlamentet separatiste dhe liderët e tyre. Presidenti i Ukrainës, Petro Poroshenko, ka thënë se të gjitha zgjedhjet lokale që mbahen në Ukrainë, duhet të organizohen në përputhje me ligjet e Ukrainës. Ai ka thënë se Kievi nuk do t'i konsiderojë si të ligjshme zgjedhjet në Donjeck dhe Luhansk. Kievi u ka ofruar vetëqeverisje trevjeçare disa pjesëve të Donjeckut dhe Luhanskut dhe ka thënë se zgjedhjet duhet të mbahen më 7 dhjetor. Separatistët pro-rusë në këto dy rajone kanë shpallur pavarësinë, pas aneksimit të Krimesë nga Rusia në muajin mars. www.voal-online.ch
|
||||
Copyright © 2005-2008 Nulled by [x-MoBiLe]. All rights reserved. |