VOAL - Online Zëri i Shqiptarëve | ||||
JURIA NË FERGUSON VENDOS TË MOS NGREJË AKUZA E Martë, 11.25.2014, 09:20am (GMT1) Juria në shtetin e Mizurit, pas shqyrtimit të provave dhe të dëshmive, në një proces që zgjati disa muaj, vendosi të mos ngrejë akuza ndaj oficerit Darren Wilson, policit të bardhë, që vrau Michael Brown-in, të riun e paarmatosur afrikano-amerikan, gjatë një ballafaqimi me të në rrugë, katër muaj më parë. Njoftimi u dha të hënën në mbrëmje vonë, pas disa ditë pritjesh të ethshme në mbarë vendin. "Pas një analize të hollësishme të të dhënave", anëtarët e jurisë vendosën se nuk ekziston shkak i mundshëm për ngritjen e akuzave ndaj oficerit Wilson, tha prokurori Robert P. McCullogh, duke folur para gjykatës në distriktin Clayton. Qindra banorë ishin mbledhur në rrugët e qytetit Fergoson, ku ndodhi vrasja e 18 vjecarit, në pritje të vendimit të jurisë. Situata në qytet është e tensionuar. Pas vendimit, disa makinave të policisë iu vu zjarri. Policia përdori gazin lotsjellës për të shpërndarë protestuesit. Prokurori McCullogh tha se anëtarët e jurisë dëgjuan mbi 70 orë dëshmi dhe analizuan një sasi të madhe të dhënash. Të dhënat dhe dëshmitë u bënë publike pas përfundimit të konferencës së shtypit. Familja e të riut të vrarë, lëshoi një deklaratë ku shpreh "zhgënjim të thellë" me vendimin. Avokatët e oficerit të policisë thanë se juria ra dakort se veprimet e policit ishin në përputhje me ligjet dhe rregulloret e policisë. www.voal-online.ch
|
||||
Copyright © 2005-2008 Nulled by [x-MoBiLe]. All rights reserved. |