VOAL - Online Zëri i Shqiptarëve | ||||
Presidenti Obama: Më 31 gusht 2010 misioni ynë luftarak në Irak përfundon E Shtunë, 02.28.2009, 12:59pm (GMT1) Zëri i Amerikës: Gati gjashtë vjet pas fillimit të luftës në Irak, Presidenti Obama ka caktuar një datë për t'i dhënë fund kësaj lufte. Presidenti i bëri këto komente në kampin Lejeune të bazës ushtarake amerikane në Karolinen e Veriut. Mijëra marinsa nga kjo bazë janë dërguar në Irak, ndërsa qindra marinsa të tjerë po bëhen gati për të shkuar në Afganistan. Plani i tërheqjes së trupave gjatë një periudhe 18 mujore është më i ngadalshëm se plani 16 mujor që zoti Obama u kishte premtuar votuesve vitin e kaluar. Megjithatë, ky plan përsëri përshpejton largimin e Shteteve të Bashkuara nga Iraku. Plani për largimin nga Iraku ishte rekomanduar nga Sekretari i mbrojtjes, Robert Gejts, dhe këshilltarë të tjerë të lartë të sigurisë. Zoti Obama planifikon të tërheqë gati 2/3 e 142,000 trupave amerikane në Irak. Ai tha se trupat e tjera që do të mbesin në Irak do të stërvisin forcat irakiane të sigurisë, do të mbrojnë civilët dhe do të luftojnë terroristët. Sipas marrëveshjes mes të dy vendeve, trupat e fundit amerikane do të largohen nga fundi i vitit 2011. Z. Obama tha se një pjesë tjetër e strategjisë së tij është që Shtetet e Bashkuara të punojnë me të gjitha vendet e Lindjes së Mesme, duke përfshirë edhe Iranin dhe Sirinë. Senatori republikan Xhon Mekejn, i cili kritikoi ashpër planin e zotit Obama për tërheqjën e trupave gjatë fushatës zgjedhore të vitit të fundit, tani thotë se është optimist me reserva se plani do të funksionojë. "Rreziku më i madh do të jetë i pranishëm në prag të zgjedhjeve të dhjetorit dhe rrethanat mund të keqësohen para ose pas mbajtjes së këtyre zgjedhjeve. Duke mbajtur gjithmonë parasysh parasysh këta faktorë, unë besoj se vendimi i Presidentit për tërheqjen e trupave është i arsyeshëm." Në fjalimin e tij në Kampin Lejeune, Presidenti Obama po ashtu konfirmoi se zoti Kristofer Hill do të jetë ambasadori i ri amerikan në Irak. Gjatë administratës së presidentit Bush zoti Hill ishte negociatori kryesor me Korenë e Veriut. |
||||
Copyright © 2005-2008 Nulled by [x-MoBiLe]. All rights reserved. |