Prishtinë, 21 nëntor Ukë Rugova,  djali i presidentit të ndjerë Ibrahim Rugova, në një intervistë për Kohën Ditore tregon se  cili është vizioni politik i tij, se si i ka tejkaluar mosmarrëveshjet me Bujar Bukoshin, çfarë kontaktesh ka pasur me ish-presidentin Fatmir Sejdiu, ku dhe si është takuar me kryetarin e PDK-së, Hashim Thaçi, dhe me kryetarin e AKR-së, Behgjet Pacollin

Isa Mustafa është njeriu i parë nga të mëdhenjtë e LDK-së që djali i presidentit të ndjerë, Ibrahim Rugova, Uka, ia kishte kumtuar ambicien për t'iu futur karrierës politike. Uka aktivisht tash merret me politikën, por është bërë sebep pikërisht Mustafa që atij të mos i vinte vështirë që gjatë fushatës për zgjedhjet e 12 dhjetorit të apelojë që të mos votohet partia që për 16 vjet është drejtuar nga i ati.

E pranon se do të ndihej keq po të vepronte në këtë mënyrë, sikur LDK-ja të mos ishte kjo që është tani. Zgjedhja e Isa Mustafës në krye të partisë më të madhe rugoviane, për të nuk paraqet ndonjë argument të fuqishëm se në këtë parti kanë filluar reformat e brendshme. Përkundrazi, ai e sheh Mustafën si peng të strukturave të vjetra të LDK-së, të cilat nuk do ta lënë atë që të lëvizë dhe t'i tregojë vlerat e veta. Në  intervistën për "Kohën Ditore", i biri i vogël i presidentit të ndjerë, Ibrahim Rugova, shprehet haptas i zhgënjyer me ndryshimin e  sjelljeve të Mustafës, pas marrjes së timonit të LDK-së, e veçmas me "ofertën përjashtuese", që i ka bërë. Thotë se asnjëherë nuk e ka paramenduar veten jashtë trungut të LDK-së, ashtu sikur nuk ka besuar se kjo parti një ditë do t'ia mbyllte dyert.

Koalicionin me AAK-në e Ramush Haradinajt ai e sheh vetëm si zgjidhje momentale, por nuk e mohon se kjo parti është treguar shumë bujare, jo vetëm me të, por edhe me të gjithë ekipin e tij.

Ukë Rugova, për herë të parë tregon se drejtuesit e AAK-së, me pëlqimin e Haradinajt, i kanë ofruar që të jetë bartësi i listës zgjedhore. Thotë se nuk e ka pranuar këtë gjë, thjesht për shkaqe humane.

Megjithatë, ai nuk pajtohet me zërat në AAK që e përdorin fjalën "kurrë" sa herë që përmendet mundësia e lidhjes së një koalicioni paszgjedhor me PDK-në. Skenari më i dëshirueshëm për të, ai thotë se do të ishte sikur koalicioni "AAK-Lista Ibrahim Rugova", t'i fitonte zgjedhjet dhe t'ia ofronte mundësinë LDK-së për të bashkëqeverisur. Por, nuk sheh asgjë të keqe, edhe sikur LDK-ja të mbetet në opozitë.