Teknologjitë moderne respektojnë ambjentin
Punimet në Hidrocentralin e Bushatit, në afërsi të Shkodrës vazhdojnë me vrull. Ndërtimi i tij i është dhënë me koncension kompanisë austriake "Verbund". Hidrocentrali do të kushtojë rreth 200 milion euro.
Punimet në Hidrocentralin e Ashtës, që po ndërtohet në Bushat të Shkodrës, po progresojnë në përputhje me afatet e përcaktuara. Hapi i parë i rëndësishëm ishte përfundimi i themeleve të platformës dhe instalimi i turbinave në stacionin Ashta 1. Zbatimin e projektit nëpërmjet teknologjisë moderne " Matrix ", po e kryen firma austriake "Porr ", e cila është kontraktuar nga kompania "Verbund ". "Verbund" fitoi një vit më parë të drejtën e koncensionit për ndërtimin e kësaj vepre madhore. Sipas inxhinierit Karlheinz Struzmann aktualisht po ndërtohen dy stacione të prodhimit të energjisë, që janë Ashta 1 dhe Ashta 2:
"Kemi nisur punën thotë zbatuesi i projektit për të ndërtuar disa basene të mëdha, që do të ulin nivelin e ujërave të lumit Drin ".
Vështirësi për ndërtimin
Hidrocentrali i Bushatit, me një fuqi të instaluar prej 50 megavatësh është i vështirë per t'u ndërtuar, për shkak të kushteve të lumit. Prandaj, për ta realizuar këtë vepër shumë të rëndësishme hidroenergjitike kemi inkuadruar specialistë dhe punëtorë me kombësi të ndryshme:
"Janë njerëz nga e gjithë Europa, por edhe nga Shqipëria", përfundon Struzmann.
Për Kryetarin e Komunës Bushat, Zef Hila, kompania austriake " Verbund " ka gjetur zgjidhjet më optimale brenda kushteve që përcakton ligji, në mënyrë që popullsia lokale të përfitojë sa më shumë nga ky projekt:
"Është një projekt bashkëkohor dhe banorët janë të vetëdijshëm dhe e mbështesin plotësisht atë, pasi kjo vepër nesër do të bëhet pjesë e infrastrukturës e fshatit Ashtë. Ndërtimi i tij zgjidh përfundimisht problemet e energjisë jo vetëm në këtë zonë, por edhe më përtej ".
Impakt pozitiv për ekonominë
Për Prefektin e Qarkut Shkodër, Maxhid Cungu, ndërtimi i hidrocentralit të Bushatit sjell një inpakt pozitiv në zhvillimin e ekonomisë dhe në punësimin e banorëve të zonës. I padëmshëm dhe mbrojtës i mjedisit në Shqipëri dhe Evropë:
"Sigurisht që ndërtimi i hidrocentralit, është një ndër projektet më të rëndësishme që po zbatohet në Shqipëri. Një vepër kjo që starton projektin e madh që ka qeveria shqiptare për shndërrimin e vendit në një supërfuqi të vogël energjitike në rajon "
Hidrocentrali i Ashtës do të prodhojë rreth 250 milion kilovat orë energji të pastër, duke furnizuar rreth 100 mijë familje shqiptare. Në total projekti shkon në 200 milion euro dhe ka hapur rreth 300 vende pune gjatë fazës së parë të ndërtimit. Kompania "Verbund" e parashikon përfundimin e tij në vitin 2012. Ky është investimi i dytë më i madh austriak në Shqipëri, gjatë këtyre 10-viteve të fundit.
(http://www.dwelle.de)